«Слово» – 16-та неділя по Сошествії Святого Духа – неділя, 9.00 год.

Ісус Хрістос, хотячі подати нам важне слово про наше спасіня, хоснує далшый образный приклад. О чоловікови, котрый одходячі на далеку дорогу закликав своїх рабів а розділив їм маєток. Каждому подля способностей.

Єдному звірив пять талантів, другому два, а третьому єден талант. Потім одышов. Ісус тым образным прикладом говорить о собі, котрый каждому звірює свої дары – таланты. Не каждому єднако. Але каждому подля способностей. І давать чоловіку час, як наложыть з тыма талантами.

Посмотьте што на Господь говорить далше: Тот, приявшый пять талантів, пішов, нарабляв із нима і здобыв другых пять талантів. Вшыткы свої силы дав до того, же помножыв маєток свого пана. Так подобно зробив і тот з двома талантами. І тот намагав ся, і здобыв другы два таланты. А тот, котрый, прияв єден талант, ро того было легше здобыти хоць лем єден талант, як тому, котрый мав пять талантів здобыти пять. Но він ани тот єден навыше не здобыв, але закопав талант до землі. І час ішов.

По довгім часі ся пан тых рабів вернув і інтерсовав ся, што робили, як нарабляли з його маєтком. І нам Господь давать час земного жывота, де каждый може нарабляти з тыма дарами, або їх закопати до землі. Значіть, не робити з нима нич. Но прийде момент, коли Господь прийде, а каждого покличе на выданя вырахованя з того, як сьме тот жывот пережыли.

Пришов першый, котрый несучі 10 талантів радостно говорить: Смоть, ты мі звірив пять талантів, я нарабляв подля своїх способностей, і здобыв хоць лем другых пять. Подобно і тот з двома талантами. Смоть я здобыв хоць лем другы два таланты. А Господь їх похвалив, словами: Добрі, рабе добрый і вірный, в малім ты быв вірний, над многым тя установлю, войди до радости свойого пана.

Но пришов і тот з єдным талантом. Він зачав обвиньованьом свого пана. Я знав, же ты чоловік твердый, збераш, де не розсыпав, жнеш, де не сіяв. Та я бояв ся і скрыв до землі талант, ту маш, што є твоє. Но того пан не похвалив, но назвав лукавый рабе і лінивый. І чує слова: Звяжте і шмарьте до тмы, там буде плач і скреготаня зубів.

Дорогы радіослухачі, мы маме тот куртый земный час, не знаме, коли ся верне Господь, коли закличе нас на вырахованя. Выхоснуйме час на здобываня і помножіня талантів. А як св. Василій говорить: таланты і дары помножуєме, коли ся з нима ділиме, коли їх не выхоснуєме лем про себе на свої пожадливости. Но коли ділиме ся з ближнім. Бо сам Господь то зарахує як зроблене йому. Што вы зробили єдному з маленькых, мі сьте то зробили. Або што вы не зробили.

Маме куртый час земного жывота, выхоснуйме го на множіня талантів служіньом нашым ближнім. Жебы сьме учули: Добрі, рабе добрый і вірный, войдь до радости свого пана.

А не дайме ся збаламити діаволу закопати талант у своїм самоубийстві, роскошах гріху, жебы раз не учути: Лукавый рабе і лінивый, шмарьте го вон до тмы, там буде плач і скреготаня зубів. Слава Ісусу Хрісту!

В неділю, 28. септембра 2025 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 28. септембра 2025 р. о 12.00 год. і 29. септембра 2025 р. о 2.00 год. за русиньскым часом.