«Слово» – 19-та неділя по Сошествії Святого Духа – неділя, 9.00 год.

Коли чоловік хоче чітати книжку в даякім языку, наперед мусить познати буквы того языка. Як наприклад нашого церьковнословяньского языка. Кедь не знаме буквы, будеме смотрити на текст, але не знаме, што там є написане. І днешнє слово Євангелія нас учіть такым духовным буквам.

Ісус Хрістос говорить слова: Што хочете, жебы люде робили вам, тото робте і вы їм. Слова, котры суть бизкы каждому. Бо каждый хоче, жебы другы о нім добрі бісідовали, жебы робили добрі, жебы не обаламутили, не высмівали, мали в почливости, не кривдили. А Ісус ту говорить, та кедь ты тото хочеш од другых, та роб і ты тото.

Кебы сьме прияли тоту першу букву А, котру нас Господь днесь учіть, та бы не было злобы, неприятельства, кривд, насилства, воєн, завистливости, єдным словом: земля бы ся змінила на рай. Хоць барз простенькы тоты слова, но як нам є тяжко і тото основне выповняти. Но Господь нас веде далше на букву Б: Коли любите лем тых, што люблять вас, та яку нагоррду за тото чекате, тадь і грішникы так роблять. І далше: Кедь робите добро тым, котры роблять добро вам, та яку нагороду за тото чекате, тадь грішникы і погане роблять так.

І далше: І кедь пожычавате лем тых, од котрых чекате, же вам то вернуть, та яку нагороду за тото чекате, і погане так роблять. Ісус Хрістос ту ставить поганів, котры хоць не познають Бога і Божы заповіді любви, предсі люблять своїх близкых. Бо мають, подля слов апостола Павла, Божый закон записаный в сердцях. Їх думкы їх або одобрюють, або одсуджують. Но тот прінціп часто односить ся може і ку нам: Я зроблю, поможу, пожычу, но што з того буду мати. А може і в одношіню ку Господу Богу: тадь Боже, я ся помолю, попощу, дам милостыню, но што з того буду мати. Роблю добро, але кедь мам із того хосен. А Ісус нам говорить, же такый прінціп не перевышує ани поганів, котры суть в тім Боже над нами.

Чоловік не видить свого ближнього, не говорячі уж о наповніню заповіді, од котрой є залежный выслов на страшні суді – што вы зробили єдному з найменшых, мі сьте то зробили. А Ісус нам указує далшы буквы: Но вы любте своїх неприятелів. Робте дбрі, жычайте а нич за то не чекайте.

Но може собі повіме, тото є тверда бісіда. Та чоловік, котрый ня не навидить робить мі зло, кривдить, одплачать за моє добро своїм злом. Як такого любити? Як такому робити добро? Но Ісус нас веде далше і потішать в тых похыбностях а може в тій бурі, котра через тото слова повставать в нашім внутрі. Ваша одміна буде щіра. Будете сынами Найвысшого. Ісус нам обіцять велику нагороду. Не говорить о тій земній, котра скоро пропадать, котру злодії можу украсти. Ай кебы сьме мали не знам якы забезпечіня, же нихто не може проникнути. Но предсі єден злодій ся вкраде і заберать вшытко, а проти ньому сьме безсилны. А то є смерть. Она заберать вшытко, розлучує од вшыткого богаства, од нашых близкых а то і од нашого тіла.

А Ісус обіцять дашто перевышуюче смерть. Обіцять быти сынами, быти дітми Найвысшого. Належати ку владыкови цілого світа, Сотворительови. Што то значіть? Ісус нам обіцять вічну блаженость. Быти богами по благодати. А то за тото курте выповніня , хоць про нас може тал тажкого. А чом є то тяжке, бо тому ся сперать наше еґо, котре все хоче мати першенство в нашій душі.

А ту є важне зошмарити наше еґо, наше самолюбство з того престола, а доволити Хрістови, жебы Він пановав в нашій душі. Прймийме тоты слова, тотты буквы доконалости од нашого Господа а старайме ся апліковати до каждого дня, жебы і о нас платило: Подьте благословлены од мойого Отця а будьте наслідниками мого Царьства. Будьте сынами Найвысшого в Його Царьстві, бо вы послухали і прияли мої слова. Слава Ісусу Хрісту!

В неділю, 19. октобра 2025 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 19. октобра 2025 р. о 12.00 год. і 20. октобра 2025 р. о 2.00 год. за русиньскым часом.