«Слово» – 20-та неділя по Сошествії Святого Духа – неділя, 9.00 год.

Ісус Хрістос прходить до міста Наїн, котре лежало недалеко од Назарета. Ішло з нима много людей і його ученикы. Ісус по дорозі навчав о Божім царьстві. Атмосфера была радостна.

Коли пришли ку брані міста, видять іншу процесію. Процесію, котра была наповнена жальом, смутком, безнадійов. Што ся стало? Виношали на марах мертвого, сына матери, котра была вдовіця. Ціле місто ішло за ньов, жебы хоць лем так дати їй потіху в тім великім болю.

Коли процесія жывота приходить ку процесії смерти, Ісус приступує ку тій матери і повів: Не плач! То не были слова, як мы звычайно говориме тым, котры стратили когось близкого. То не є не плач, нич не зміниш, так то мусить быти. Закон смерти допаде раз на каждого, нихто ся не може ослободити спід того закона. Но, коли Ісус Хрістос говорить тоты слова не плач, суть тоты самы, котры зазвучать пізніше: Тобі говорю встань.

То были слова наповнены силов і владов. Говорить їх тот, котрый мать владу над смертьов. Ісус своїм приходом праві в часі смерти того молодого чоловіка хоче указати, як людьство, коли увірило злому, підпало смерти. А Ісус приходить а говорить не плач! Я приходжу ослободити чоловіка од влады царьства смерти і привести до царьства жывота. Жебы указати передобраз побіды жывота, обернув ся ку мертвому і повів: Тобі говорю встань! А мертвый собі сів і зачав говорити. А Ісус його передав його матери.

Дорогы радіослухачі, тото слово є і про нас радостным посолством. Хрістос зничів владу смерти, позывать людей, жебы ся рішіньом слободной волі придали на сторону жывота, до той процесії жывота. Жебы не жыти в безнадії, але праві наопак, жыти в надії на воскресіня, на вічну блаженость. На то, што апостол написав: людске око не виділо, а ухо не чуло, што Бог приготовив про тых, котры його люблять. Слава Ісусу Хрісту!

В неділю, 26. октобра 2025 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 26. октобра 2025 р. о 12.00 год. і 27. октобра 2025 р. о 2.00 год. за русиньскым часом.