«Лемкы в Центрі» – цикль подій стартує уж в тым тыжни

Уж в тым тыжни зачне ся цикль подій в рамках шыршого проєкту пн. «Лемкы в Центрі». Акциі одбудут ся в днях 21.-22. листопада/новембра і в понедільок, 24. листопада/новембра.

«В Любіні зас стрітят ся традиция і модерніст! Центр Творчого Діяня просит на другу едицию фестівалю Лемкы в Центрі – подію приближаючу богатство лемківской культуры в модерным выданю. В проґрамі пропозициі, якы лучат фольклор, штуку і дізайн – од показів моды, через концерты і выставы, по звиджаня памятковой церкви. Вступне на вшыткы подіі дармо, а орґанізаторы заохочуют жытелів до спільного одкрываня богатства культуры Лемків жыючых в реґіоні».

Так тіж під конец того тыжня, бо в пятницю 21. листопада/новембра о 18.00 год. в Ґалериі Cuprum Арена обуде ся показ моды з колекциі РУСИНКА Анны Мариі Зиґмунт та концерт ЛАПіТ «Ластівочка».

Кєд іде о колекцию РУСИНКА – ту треба пояснити, што як раз тота колекция інспірувана є традицийным облечыньом і культуром Карпатскых Русинів. Анна Мария Зиґмунт передом выпустила дві інчы колекциі. Окрем Polexia – колекциі, яка інспірувана была вельокультуровістю Підляша, вказала она світу колекцию модерного облечыня пн. Лемковина, што вказує на інспірацию лемківском народном культуром.

22. листопада/новембра о 11.00 год. буде мож зайти до православной церкви св. Тройці, де парох, о. прот. Богдан Репела оповіст о істориі любіньской парохіі та загалом о православю. Хто іщы не был в любіньскій церкви – буде міг гын зайти. «Будівля была вознесена в 1877 р. як протестанстка каплиця, а од 1959 р. служыт місцевій православній спільноті. З часом святыня была ремонтувана і збогачана – м.ін. отримала богатый іконостас і характерный розпис» – пишут орґанізаторы. 

Третьом з циклю подій, яка одбуде ся на початку будучого тыжня – 24. листопада/новембра в Ґалериі Центру Творчого Діяня в Любіні, буде вернісаж выставы творчости Епіфана Дровняка – Никыфора. То тым більше выняткова подія, кєд же першый раз в істориі Любіна буде запрезентувана творчіст того выдатного лемківского творці.

«В році, в котрым припадат 130. річниця народин артисты, выстава являт ся прекрасным поклoном для його спадковины і творчой особовости. Презентуваны працы походят з приватной колекциі Роберта Довгана, яка обнимат близко пятдесят камеральных, але вынятково суґестивных діл, з якых більшіст возникла в меджевоєнным періоді – признаваным за найважнійшый етап в творчости Никыфора» – пише ся в заявці до подіі.

Серед цінных експонатів будут тіж архівны фотоґрафіі представляючы Никыфора. Тоты походят з колекциі Павла Карлика і Анны Бороды-Карлик.

Выстава буде доступна місяц – до 19. грудня/децембра.