Сумар дня на 21. листопада/новембра 2025 р.

Приносиме вам сумар медияльной ґрупы ЛЕМ.фм+ на ден 21. листопада/новембра 2025 р.

«Лемкы в Центрі» – показ моды, концерт, стріча в церкви і образы Никыфора в Любіні

Уж днес в Любіні зачынат ся цикль подій – пн. «Лемкы в Центрі». Є то ініциятива, котрой цілю є представити лемківску культуру, язык і звыкы шыршій соспільности. На подіі просит Центр Творчого Діяня в Любіні. Днес о 18.00 год. в Ґалериі Cuprum Арена обуде ся показ моды з колекциі РУСИНКА Анны Мариі Зиґмунт. По показі в проґрамі подіі єст концерт Лемківского Ансамблю Пісні і Танця «Ластівочка». Заран о 11.00 год. буде мож зайти до православной церкви св. Тройці, де парох, о. Богдан Репела оповіст о істориі любіньской парохіі та загалом о православю. А од найблизшого понеділька в ґалериі Центра Творчого Діяня буде мож обзерати выставу «Никыфор. Феномен саморідного таланту» – першый раз в істориі міста буде презентувана выстава творів Епіфана Дровняка. Експозиция буде доступна до обзераня до 19. грудня/децембра.

Камеральный концерт Юлиі Дошны і Івоны Іскры-Криницкой

О тыжден в Санковій одбуде ся стріча з Юлийом Дошном і Івоном Іскром-Криницком, в рамках підсумуваня стипендияльного проґраму «Мастер і ученик», веденого Нацийональным Інститутом Культуры і Спадковины Села. В тым році серед выріжненых пар нашли ся Юлия Дошна і Івона Іскра-Криницка, з проєктом наукы лемківскых пісен. Результаты паромісячной спілпрацы будут презентуваны в часі стрічы, котра пройде в пятницю 28. листопада/новембра о 18.00 год. в Майстерни Карпат в Санковій. Стипендисткы запрезентуют выбраны пісні та оповідят о спільных варштатах і одчутях по закінчыню проґраму.

Прелекция о Бачваньскых Русинах в Рускій Бурсі в Ґорлицях 

А уж заран в Рускій Бурсі в Ґорлицях др габ. Томаш Квока выголосит прелекцию о Бачваньскых Русинах. Выклад приближыт історию Русинів в Войводині од половины XVIII столітя по сучасніст, з особливым увзаглядніньом істориі ХХ столітя: меджевоєнного періоду культурно-нацийонального одроджыня, повоєнного розвитку в социялистичній Югославіі та соспільно-політичных перемін по 1990 році і днес. Др габ. Томаш Квока єст абсольвентом сербской філолоґіі Ягайлоньского Університету, ступін габілітуваного доктора здобыл в обшыри гуманістичных наук в дисципліні языкознавство. Єст автором моноґрафіі «Войводина і єй Русины. О языку, культурі і істориі войводиньскых Русинів». Науково занимат ся м.ін. історийом і специфіком Войводины, языками меншын той обшыри та языковом політиком в Сербіі. Серед його заінтересувань сут і русиньскы языкы в Середній Европі ци лемківска/русиньска культура в Польщы і Войводині. Доповід зачне ся заран о 17.00 год. і буде выголошена в польскым языку.

О перспективі гірскых ґмін в контексті климатичных змін на конференциі в Кракові

14. листопада/новембра в Конґресовым Центрі Рільничого Університету в Кракові прошла медженародна конференция пн. «Модерный розвиток сельскых обшыри – зліпшыня якости жытя і локального розвитку в добі климатичных вызвань». В подіі брали участ самоурадовці, науковці і експерты з Австриі, Швайцариі, Німец і Польщы. Низкій Бескід репрезентувала війт ґміны Санкова Малґожата Малух. На конференциі бесідували м.ін. о европейскых моделях адаптациі до змін климату, новых підходах до просторного плянуваня та о соспільно-господарчых ключовых вызванях перед сучасным селом. Війт ґміны Санкова презентувала досвідчыня ґміны та перспективу гірскых ґмін в контексті поступуючых климатичных змін.