Сумар дня на 24. листопада/новембра 2025 р.

Приносиме вам сумар медияльной ґрупы ЛЕМ.фм+ на ден 24. листопада/новембра 2025 р.

Великій успіх лемківской оперы «Голос» в Варшаві

В минулу суботу в Варшаві одбыл ся черговый показ лемківской оперы «Голос». І тым разом лемківска опера однесла великій успіх. Так як і перше, заінтересуваня спектакльом было великє. Заполнила ся ціла саля в Музею Істориі Польщы – в сумі показ обзерало понад 500 осіб. Видовиско зобрало барз позитивны рецензиі в польскых медиях. Як поінформували орґазнізаторы, буде іщы єден, фіналовый показ оперы «Голос». Одбуде ся він 1. лютого/фебруара 2026 р. во Вроцлаві. Неодолга буде мож придбати білеты. Припомнийме, што премєра лемківской оперы «Голос» одбыла ся кінцьом минулого рока в Нацийональным Форум Музикы во Вроцлаві. Другій показ одбыл ся в Краківскій Опері. «Голос» то проєкт композиторкы Дариі Кузяк, якій лучыт в собі сучасну музику з лемківском народном музиком і електроніком. Сценічна презентация закладат участ двох вокалисток, лемківской капелі, оркєстры з дириґентом, танцюристів з Лемківского Ансамблю Пісні і Танця «Кычера» і сучасных. Веце о опері, в тым інтервю з єй авторком, як і коментар до видовиска в Краківскій Опері можете найти на нашым портали.

Вышол дальшый «Альманах днешньой русинськой літературы»

В тых днях вышол новый «Альманах днешньой русинськой літературы» на 2025 рік. Інформувал о тым Юрий Шыпович, голова Русиньского Культуролоґічного Клюбу, што єст выдавательом тогорічного Альманаху. То уж шестый річник той публикациі, яка презентує найновшу творчіст сучасных русиньскых авторів з Підкарпатской Руси. В Альманаху за 2025 р. поміщено творы 15 авторів, в тым дакількох новых. Веце о публикациі прочытате в дописі на нашым портали.

Камеральный концерт Юлиі Дошны і Івоны Іскры-Криницкой

Змінил ся термін стрічы з Юлийом Дошном і Івоном Іскром-Криницком, в рамках підсумуваня стипендияльного проґраму «Мастер і ученик», веденого Нацийональным Інститутом Культуры і Спадковины Села. Стріча одбуде ся в найближшу пятницю 28. листопада/новембра о 18.00 год. в Майстерни Карпат в Санковій. Юлия Дошна і Івона Іскра-Криницка нашли ся в тым році серед выріжненых пар в проґрамі «Мастер і ученик», з проєктом наукы лемківскых пісен. Результаты паромісячной спілпрацы будут презентуваны на стрічы в Санковій. Стипендисткы запрезентуют выбраны пісні та оповідят о спільных варштатах і одчутях по закінчыню проґраму.

В Креници побудуют водный парк

В Креници вошол в жытя новый містный плян просторного заґаздуваня. Завдякы ньому можливе буде побудувати санечковый тор на Горі Івонка, містецкій театр на дептаку, але і долгожданый водный парк на Чорным Потоку. Подля власти курорту, інвестиция має быти дальшым імпульсом для розвитку туристикы. Самоуряд хотіл підняти ся будовы водного парку іщы в 2017 році, але кошты были за высокы. В 2023 р. терен під інвестицию был выкупленый приватным інвестором. Як подал бургомайстер Крениці Пьотр Рыба, в тым тыжни одбуде ся стріча з інвесторами. Дальшым кроком буде отриманя середовискового рішыня. Знатя, што окрем самого водного парку на місци стане тіж готель, а на поблизкых тернах самоуряд выбудує паркінґ на 700 місц. Бургомайстер рахує, што будова новой атракциі могла бы ся зачати в 2028 р.