Сумар дня на 26. листопада/новембра 2025 р.

Приносиме вам сумар медияльной ґрупы ЛЕМ.фм+ на ден 26. листопада/новембра 2025 р.

Ґміна Санкова найліпша в обшыри охороны середовиска

В понедільок 24. листопада/новембра в Копальни Соли в Вєлічці одбыла ся ґаля вручыня нагорід #ekoLIDER 2025 орґанізувана Воєвідскым Фундушом Охороны Середовиска і Водной Господаркы в Кракові. Выріжнены нагородами были малопольскы ґміны і інституциі, якы выріжнили ся в своій діяльности для охороны середовиска. В катеґориі сельска #ekoGMINA І місце заняла Ґміна Санкова. Як подали в поясніню признаня нагороды – ґміна зреализувала шор проеколоґічных ініциятив, м.ін. замонтували три солярны лавкы, 25 гыбридовых лямп засиляных солярном енерґійом або од вітру. На терені спортового комплексу в Санковій зробили квітны лукы, як жытлиско для овадів – місце, котре підперат біоріжнорідніст. Додатково ґміна реализувала ініциятивы для охороны землі і господаруваня смітьом. Окрем того урухомлено системы ретенциі дощовой воды, ґміна дофінансувала вісем придомашніх очыщален і передала 97 компостовників. Купила так само ґратя до моніторуваня якости повітря. Нагороду становит еколоґічна статуя в формі дерева та чек вартости 20 тис. зл.

Підпертя для Охотничой Протиогньовой Стражы ґорлицкого повіту

Конец рока явит ся на плюс для довх єдиниц Охотничой Протиогньовой Стражы ґорлицкого повіту. В Ґладышові закінчыла ся дволітня модернізация ремізы. Сідибу наново оддали до диспозициі стражакам. В рамках робіт повело ся м.ін. забудувати част обєкту, котра скорше была лем задашена – тепер то інтеґральна част цілого будинку. Стражакы будут гын тримати аґреґаты, причепы і інче ґратя. Охотнича Протиогньова Страж діє в рамках Державного Ратівничо-Гасничого Систему. В інчій части повіту передали нове авто – легкій розпознавчо-ратівничый поізд трафил до Охотничой Протиогньовой Стражы в Санковій, якій купили в рамках польско-словацкого проєкту трансграничной спілпрацы ґмін, котры належат до Союзу Ґмін Басену Вислокы і Пряшівского Самосправного Краю. Попереднє авто, котре через 13 років хоснували в Санковій, передали Глядавчо-Ратівничій Ґрупі Охотничой Протиогньовой Стражы в Сярах. Оба авта уможливлят скоре доіханя до місц акций, розпознаваня і успішне передаваня інформаций необхідных до підниманя дальшых ратунковых діянь.

Святочне засіданя Спільной Комісиі Уряду та Нацийональных і Етнічных Меншын одбуде ся початком грудня/децембра

Торжественне засіданя з нагоды 20-літя діяльности Спільной Комісиі Уряду та Нацийональных і Етнічных Меншын одбуде ся о два тыжні, 10. грудня/децембра в Міністерстві Внутрішній Справ і Адміністрациі. В проґрамі стрічы єст м.ін. вручыня одзначынь і подякувань для членів Спільной Комісиі, а тіж особам заслуженым в діянях, якы служат реализациі прав меншын. В дальшій части заплянували панельову дискусию пн. «20 років Спільной Комісиі Уряду та Нацийональных і Етнічных Меншын – надіі, практика, перспективы». В склад Спільной Комісиі входят представникы вшыткых выміненых уставом нацийональных і етнічных меншын, представникы соспільности, котра хоснує реґіональный язык, та представникы ріжных ресортів – м.ін. міністра властивого до справ реліґійных віроісповідань і меншын, публичной адміністрациі, до справ культуры і нацийональной спадковины, освіты і выхованя і інчых. До задач Спільной Комисиі зачыслят ся м.ім. выражаня опіній в справах, котры тыкают реализациі прав і потеб меншын, опініюваня проґрамів для підтрманя і розвитку культурной достоменности меншын ци опініюваня правных актів, котры тыкают меншын. Актуальныма членами за лемківску меншыну сут проф. Штефан Дудра і др Мирослава Копыстянска. Іх каденция тырват уж 11 років. Скорше через 9 років в комісиі были др габ. Олена Дуць-Файфер та Штефан Гладик.

Фот. Ґміна Санкова