«Слово» – 25-та неділя по Сошествії Святого Духа – неділя, 9.00 год.

Днешнє слово нам хоче принести хосен з двох боків. А яке є то слово? За Ісусом приходить чоловік з вопросом. Быв то учітель закона, котрый давать вопрос: Што робити, жебы набыти вічный жывот?

Повіме собі, тадь, приходить з важным і мудрым вопросом. Не звідує ся як тот, котрый пришов з тым, жебы Ісус наказав його братови поділити ся о маєток по родічах. Но тот глядать, што потрібне про вічность. Але тот вопрос мать єдно але. Справды пришов Ісуса покушати, глядати, што бы могло послужыти Його поїмати на слові, жебы Його обвинити. Ісус знав, што одбывать ся в тім чоловіку, видів до його сердця, вдиів тото плане наміріня, котре было закрыте тым вонкашнім вопросом.

Но видів і маленьку іскреску добра, котра была в тім чоловіку. А так не загасив, не одкрыв його злобне наміріня. Але давать йому одповідь: Што написане в законі, як там чіташ? А коли тот одповів о заповіді любви ку Богу і ближньому, Ісус му на то, так роб і будеш жыти. Но тот чоловік хотів ся оправдати. Хотів ся оправдати, же пришов з такыма планыма думками, наміріньом. А ся звідує: Хто є тогды мій ближній?

А Ісус, видячі як та іскерка, котра не была загашена, ся розгоріла до векшого огника, давать йому одповідь образным прикладом о чоловікови, котрый пав до рук розбійників, коли сходив з Єрусалима до Єрихона. Обрали го о вшытко і охабили там наполовину мертвого лежати. Ідучі тов дорогов священик і левіт не помогли, але поміг йому єден Самарян.

А ту є вопрос, чом Самарян? Бо Жыды ненавиділи Самарянів, не сходили ся з нима. То видиме на прикладі бісіды зо женов Самарянков. А Ісуса часто называли Самряном. То є – їм неприятельскым. А Ісус указує тым образным прикладом, же тот чоловік є ціле людьство, котре одышло од Бога на покушаня діавола, і впало до рук рабства демонів. А чоловік ся став неприятельскым ку Богу. Дав ся на сторону зла.

Но Ісус приходить на землю, подавать поміч павшому людству. Тыж тым чоловіком є і тот учітель закона, котрый пришов, жебы робив Ісусови зло, поїмав го на слові, а Ісус робить Йому добро, веде го ку спасіню, не гасить той іскеркы добра. Тым чоловіком є каждый чоловік, а Ісус указує своє милосердя, свою любов.

А другый момент є, же бере його до гостинця, де старать ся о нього і обіцять нагороду властникови гостинця, коли ся верне. А закончує словами: Ідь, і ты роб подобно.

Так як мы приїмаме Боже любов, Його милосердя наперек нашой грішности, і Ісус нас не одверьгує, але кличе ку собі, жебы подати вино і олій на нашы раны і струпы гріха, так і од нас хоче проявляти милосердя ку нашым ближнім, без огляду на то, ці суть в добрім одношіню ку нам або нас ненавидять. Тото слово, ідь, і роб так само, звучіть і про нас. Слава Ісусу Хрісту!

В неділю, 30. новембра 2025 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 30. новембра 2025 р. о 12.00 год. і 1. децембра 2025 р. о 2.00 год. за русиньскым часом.