Наталия Пелехач з бронзовым медальом Чемпіонату Світа в танци!

Ґрупа парунадцетлітніх танцюристок зо Студия Танця Дестіно з Ропы однесла спектакулярный успіх – званя ІІ Віцемастера Світа в змаганях Чемпіонату Світа Show Dance IDO. Змаганя проходили в Італиі в днях од 17. до 22. листопада/новембра тр. Серед нагородженых танцюристок є Наталия Пелехач з Ґладышова, активна і в соспільным лемківскым жытю. Сердечні ґратулюєме!

По успішным выступі підчас Державного Чемпіонату Світа IDO в Ланцуті в квітни/апріли тр., орґанізуваного Польскым Союзом Танця, ґрупа Дестіно, котра здобыла гын найвысшый можливый результат – званя Мастера Польщы в катеґориі Show Dance Groups 13-16 років, сягнула по барз высокє місце уж на світовым рівни. Молоды артисткы ривализували аж з 40. інчыма ґрупами з цілого світа.

Узнаня жырі і высокы ноты здобыли за уклад танця «Сім доріг до миру». «В укладі тым кажда з нас репрезентує якісый континент. На початку показуєме незгоду і свары, а на конец спілпрацу. Хочеме переказати, же соспільна згода і поміч може дати мир і гармонію. Хореоґрафію зробила нам пані Моніка Голуб, а за вытренуваня нас одповідат пані Катажына Свєнс» – оповідат Наталия Пелехач, танюристка, бронзова медалистка.

Студийо Танця Дестіно то локальна школа танця, яка діє в Ґорлицях і в Ропі, веде науку танця розмаітых стилів для вшыткых віковых ґруп, на ріжным етапі заавансуваня. Наталия Пелехач оповідат нам, як то ся стало, же зачала танцювати. «Моя пригода з танцьом зачала ся десят років тому, коли родиче записували моі сестры до Ґорлицкого Центра Культуры на ріжны занятя. Товды вказало ся, же сут тіж занятя з танця для діти, а я, одколи памятам, хотіла-м танцювати. Початково то была лем така забава з танцьом. По році перенесла-м ся до кус старшой ґрупы, там вчыли сме ся кроків, технікы і робили сме хореоґрафіі на конкурсы. По пандеміі наша ґрупа ся розпала, а я перенесла-м ся до Ропы, до Дестіно, де дотепер ходжу на занятя».

Ґрупу юньорок творит сім парунадцетлітніх дівчат з реґіону, окрем Наталиі Пелехач сут то: Александра Гадальска, Мая Карляк, Мая Лукашык, Емілия Матула, Амелия Пенкаля і Ґабриєля Спіжевска. Осягніня так высокого місця вымагало од дівчат і іх опікунів годин тренуваня. «Тренінґы до чемпіонату мали сме раз в тыжни, окрем того мали сме іщы трираз в тыжни інчы тренінґы напр. з технікы ци акробатикы. Было то часом кус трудне, особливо, як в некотры дни іхали сме на занятя зараз по школі і вертали сме пізно. З той причыны часом оминяли ня ріжны выізды ци стрічы зо знаємыма» – оповідат Наталия. Труд ся оплатил.

«Танцюристкы з Дестіно вказали надзвычайну силу характеру, детермінацию, одданя і правдивого бойового духа. Лишыли на паркєті своі серця. Дякуєме дівчатам за тоту спільну дорогу, вытрываліст і емоциі» – подає Студийо Танця Дестіно.

Ґладышовянка од наймолодшых років выступує на сцені – як школярка лемківского языка брала участ в конкурсах рецитациі, в шкільных показах колядничых ґруп орґанізуваных в Бурсі (тіж як ведуча конферансиєрку) і так само як сестры, Ольга і Мелянія, уж як парулітня дівчынка была членкыньом ансамблю Терочка.

«Великы подякуваня кєруєме тіж до тренерів за мотивацию, підпертя, терпеливіст і дбаліст о каждый деталь» – пише дале Студийо Танця Дестіно.

Звідали сме Наталиі, што є барже вымагаюче – фізичный высилок ци розумліня ся з дівчатами. «Для мене барже вымагаючый єст фізичный высилок, бо з дівчынами добрі ся доґадуєме. Трафляют ся малы свары ци ріжниці опіній, але ся приязниме і підпераме».

Участ в чемпіонаті світа то великє осягніня і великы емоциі. Котрый момент записал ся найбарже? «На певно момент по першым выступі, была єм барз задоволена з выступу і знала-м, же буду з нас барз горда незалежні од того, котре місце займеме. Очывидно тіж товды, коли достали сме ся до фіналу, чула єм хыбаль кажду емоцию» – оповідат Наталия.

Яка рефлексия остане з молодом артистком з невеличкого Ґладышова по участи в світовых змаганях? «Же радіст з каждого малого ци векшого успіху єст барз важна, але не єст важне, як щестливым ци смутным єст ся перед каждым выступом – треба ся зосередити і одложыти цілу решту на бік. І іщы єдно – жебы в каждый выступ вкладати ціле своє серце, то може рішыти о остаточным результаті» – констатує. «Нашым секретным складником єст тото, же вказуєме, што факт, же походиме з малых місцевости, не єст перешкодом до сполняня своіх мрий».