«Слово» – Праздник святого апостола Андрія – неділя, 9.00 год.

Вчера сме в нашім літурґічнім календарю праздновали память святого апостола Андрія первозванного. В днешнім духовнім слові позаставме ся дакількома думками на наш духовный хосен над жывотом того великого апостола.

Андрій быв братом апоростола Петра. Походив з Ґалілеї, з Вітсаїды. Од мала вєдно зо своїм отцьом Йоном ся занимала ловліньом рыб. Коли слух о Йоанови Крестительови дішов аж до Ґалілеї, много приходило ку ньому на Йордан. Бо думали о Йоанови, же він є обіцяный месія.

Так іде і Андрій, і ставать єдным з його учеників. Быв свідком і покрещіня Ісуса в Йордані. А тыж чув і свідчіня Йоана, коли Ісус переходив: То агнець – баранок Божый, котрый бере гріх світа. Вєдно з далшым учеником ся пустив за Ісусом. Ісус ся обернув а ся звідує: Што глядате? А они: Учітелю, де перебываш? А Ісус їм повів: Подьте а видьте. А перебыли у нього тот день.

Но Андрій вышов уж іншым чоловіком. Нарадованый приходить ку свойому братови Сімонови названым Петром – а звістує: Мы нашли Месію, котрого проповідали пророкы. А приводить го ку Ісусови. Зато Андрій ся зове первозванный – першозакликаный. А тото слово його провадить цілый далшый час.

Мы нашли желаного, очекованого. То суть слова, з котрыма по Сошествію Святого Духа Андрій одхоить голосити слова Євангелія до країв, де нескірше повстала славна Бізантійска імперіа. І є основоположником візантійской Церькви. Коли переходив і словяньскы землі, коло місця, де нескірше выросло місто Київ, повідать ученикови: Ту раз повстане велике місто, котре прославить ся світлом віры в Хріста.

На своїх апостольскых дорогах зазнав много пронаслідованя і бід. Не перестав голосити – мы нашли Спасителя, а Того вам оголошаме. Господь його наділив творіньом чудесных діл. Наконець приходить до міста Патры, на югу Ґреції, де і завершыв свій плодный апотольскый жывот мученицков кровльов.

Выздравив там і жену римского проконзула Еґеата, котра ся звала Максимилла і много іншых, через што векшына міста увірила в Хріста. Коли Еґеат одышов вызваний цісарьом Нероном до Рима, повірив свого брата справованьом міста. Він тыж вєдно з Максимиллов дав ся покрестити. Коли Еґеат ся вернув, розъїв ся, же ідольскы храмы были розрушованы і опущены. Дав увязнити Андрія. Но він і увязніці проповідав народу, котрый сходив ся ку ньому.

Наконець його Еґеат одсудив на роспятя на кресті. Андрій з радостьов принимать тото рішіня. І прославлять Святый Крест, на котрім оддавать до рук Хріста свою безсмертну душу.

Дорогы радіослухачі, в кондаку праздника апостола Андрія звучать слова. Так, як і тогды і ку нам кличеш: Подьте, мы нашли желаного. Най нас наповнить вдячность, же і мы сьме могли спознати Хріста – желаного. А тоту радость і свідчіня давайме і тым, што суть коло нас. Подьте, зажыйте, бо мы нашли Желаного. Слава Ісусу Хрісту!

В неділю, 14. децембра 2025 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 14. децембра 2025 р. о 12.00 год. і 15. децембра 2025 р. о 2.00 год. за русиньскым часом.