«Слово» – Праздник святого Николая Чудотворця – неділя, 9.00 год.

Святый, котрого познають малы і великы, котрый є відомый по цілім світі, є великый святитель Мір лікійскый – святый Николай. Хто быв святый Николай, яке посолство нам давать його жывот про нас?

Святый Николай ся народив в місті Патара в половині 3 стороча. О його дітиньскых роках не маме вельо інформацій, лем з його нескіршого жывота можеме видіти, же то насіня, то зеренко посіяне його родічами, принесло великы плоды. Його выховов, коли уж быв старшый, ся занимав його стрыко Николай, котрый быв єпіскопом в тім місті. А котрый і нескірше высятив го на священика. Коли одходив на путованя до Святой землі, повірив молодого священика Николая справованьом свойой єпархії.

Николай серьйозно взяв за тоту роботу, старав ся о духовны потребы єпархії, хоць іщі лем як священик, но діяв уж одповідно як бы быв єпіскопом. По родічах, котры уж ся преставили в тім часі до вічности, йому припало велике богатство, він його выхосновав на потребы бідных. Але робив то в таємности, жебы нихто о його добрых ділах не знав. Памятаючі так слова євангелія: Най твоя права рука не знать, што робить ліва.

Так поміг єдному богатому чоловікови, котрый меджічасом збіднів, а хотів дати свої три дівкы на нечестны діла, жебы здобыли пінязі на свадьбу. Николай тайно метав мішок з пінязьми до того дому перед тым, як кажда з тых дівок ся мала оддавати.

Коли ся його стрыко вернув, і Николай ся выбрав до Єрусалима, де хотів в оддліню од людей дожыти в монашім жывоті. Но Божа воля была інша. Так слухаючі Божый голос вернув ся до свого краю, а вступив до монастыря, котрый заложыв його стрыко. Но і там чує голос, же мать вернути ся до світа, і там робити над спасіньом душ.

Тогды одходить до міста Міры, никым не познатый там хотів зачати новый жывот. Но там умер єпіскоп а Божым ряджіньом быв праві Николай выбраный на тото достоїнство. Николай, видячі в тім Божу волю, приймать тото посланя. А іщі з векшов запаленостьов ся пущать до роботы на полі митрополії.

Но пришло пронаслідована за Діоклетіана, а святый Николай як запаленый проповідник быв взятый і шмареный до вязніці, де перебыв довгый час. Но і в тім видів принагоду голосити Боже слово. Невіруючім звістовав світло Євангелія, а увязненым хрістанам додавав силу і надію своїм словом твердо вірити а пережыти вышткы грозьбы і мукы, і набыти вінець славы.

Коли святый Константін дав слободу хрістіанам, вернув ся і святый Николай ку свойому стаду окрашеный вінцьом терпітеля за Хріста, і дожыв до глубокой старобы у своїй митрополії. Господь його наділив творіньом чудесных діл. Святого Николая характерізовала велика доброта його сердця, быв близко тых, котры потребовали поміч, ці матеріалну, ці духовну.

Але тота його доброта выходила з його великой любви ку Хрістови. А все, коли якесь добро робив, мав на памяти слова Спасителя: Што вы зробили єдному з найменшых, мі сьте то зробили. Не смотрив на славу ани людьскы похвалы, але глядав славу у єдиного Бога. Тым є прикладом до наслідованя і про нас. Слава Ісусу Хрісту!

В неділю, 21. децембра 2025 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 21. децембра 2025 р. о 12.00 год. і 22. децембра 2025 р. о 2.00 год. за русиньскым часом.