Сумар дня на 3. лютого/фебруара 2026 р.

Приносиме вам сумар медияльной ґрупы ЛЕМ.фм+ на ден 3. лютого/фебруара 2026 р.

Догваріня на реализацию проєкту «Ворота Низкого Бескіду. Ґорлицi-Бардиів» пiдписане

30. ciчня/януара в столици Підгаля, Новым Торгу, представникы мiста Ґорлицi пiдписали догваріня на реализацию проєкту «Ворота Низкого Бескіду. Ґорлицi-Бардиів». Ґорлицi отримают більше як 60 тис. евро (250 тис. злотых) дофiнансуваня з проґраму Iнтерреґ Польща-Словация 2021-2027, завдякы котрому уж скоро мают зачати дiяня, якы будут реализуваны для промоциi Бескіду i підтримуваня польско-словацкой трансграничной спiлпрацы. В проєкт вписаны сут штырі задачы, якы будут в його рамках выполнены, то єст, 1) Гiрскiй Фестiваль в Ґорлицях – свято Низкого Бескіду, 2) Загальнопольска кампанiя «Познай Низкiй Бескід», 3) мобiльна фотоґрафiчна выстава «Незнаный Бескід» i 4) Двоязычна мапа атракций Низкого Бескіду.

Пропозициi на зимовы вакациi

Як уж ся зачали зимовы вакациi, вартат подумати, што в тых свобідных днях мож робити. В скансенi в Шымбаку i Мазярскiй Загородi в Лоси од 2. до 15. лютого/фебруара орґанiзуваны сут етноґрафiчны, едукацийны, а тiж плястичны варштаты для дiти, дорослых, як i цiлых родин. На занятях буде мож нп. прирыхтувати чачка iнспiруваны тыма традицийныма, котры роблено декады тому, ци на варштатах пн. «Скарбы з улия» створити памятковы табличкы з пчолиного воску. Вшыткы потрiбны дрібницi находят ся на сторонi Музею. Для тых, котрым спомнены локализациi не сут по дорозi, передаєме, што Малопольскє i Нижньошлезскє Воєвідства на своiх сайтах приготовили специяльны спискы культуральных подiй, якы будут проходити в часі зимовых вакаций. Мотузкы до них находят ся гев: http://www.malopolska.pl/aktualnosci/kultura/kulturalna-malopolska-na-ferie-zimowe, http://www.dolnyslask.travel/wydarzenia/kalendarium-wydarzen-kulturalnych-na-dolnym-slasku.

Каталоґ выставы «Двурнiк – Дровняк. Iнспiрациi» уж доступный 

Кiнцьом минулого рока, значыт од 6. вересня/септембра до 23. листопада/новембра в Музею Никыфора в Креници отворена была выстава «Двурнiк – Дровняк. Iнспiрациi». Выстава прирыхтувана з нагоды 130. річниці народин Никыфора основана была на артистичным дiалоґу медже Никыфором, значыт Епiфаном Дровняком, а Едвардом Двурнiком – професийным маляром, котрого малярском iнспiрацийом была творчiст як раз Никыфора. Для тых, котры были на выставi, а тiж для тых, котры такой нагоды не мали, Музей Сандецкой Землi выдал розшыреный каталоґ выставы пiд такым же названьом. В публикациi найдеме роботы Двурнiка, есеi i фотоґрафii, якы описуют артистичный контекст його творчости. Веце iнформаций найдете на сайтi Музею.

Опера «Голос» зас на сценi

В неділю 1. лютого/фебруара во Вроцлавi, в Нацийональным Форум Музикы, пятый уж раз на сценi мож было обзерати лемкiвску оперу «Голос». I тот раз подiя тiшыла ся великым заiнтересуваньом – публика рахувала близко пілтора тисяча люди. Припомнийме, што премєра оперы одбыла ся в 2024 р. Для тых, котры бы хтiли обiзріти «Голос», рекомендуєме слiдити сторону оперы, мают ся бо появити заповiди новых концертiв. В рамках оперовых iнформаций – фурт отворена є збiрка на ґнома, котрый мал бы быти поставленый во Вроцлавi як памятка той подii. Iніциятива має утырвалити подію в просторi мiста i пошыряти лемкiвску культуру. Колекту найдете на плятформi Zrzutka.pl під назвом: Krasnal Łemko na pamiątkę Opery «Hołos».