Сумар дня на 10. лютого/фебруара 2026 р.

Приносиме вам сумар медияльной ґрупы ЛЕМ.фм+ на ден 10. лютого/фебруара 2026 р.

41. засiданя Рады Єрархів Грекокатолицкой Митрополитной Церкви на Словациi

5. i 6. лютого/фебруара в Грекокатолицкым Архієпископствi в Пряшові проходило 41. засiданя Рады Єрархів Грекокатолицкой Митрополитной Церкви sui iuris на Словациi. Протягом засiданя принято рiшыня, же будут основаны три новы митрополитны комісиi – душпастырска, правницка і про молодіж, якых задачом буде на рiвни митрополиі занимати ся темами, котры сут общы для вшыткых єпархій. Єпископы проголосували справу приказаных праздникiв і постной дисциплiны, котры по схвалiню мали бы быти обовязковы для каждого грекокатолика. Окрем того, на реченiй стрiчы апостольскій візитатор грекокатоликів зо Словациi в захiдній Европі, владыка Мілян Лах, інформувал о потребах і новых задачах, якы стоят перед грекокатолицкыма священниками за границьом. Владыкы бесідували тiж о потребі выдати пiдручник для священника, якій обнимал бы специфiку душпатырства в новiй, днешнiй добi християнства. Рада єрархів основана была в 2008 р. i є законодавчым орґаном, якiй мат помагати Митрополиті в выконуваню його власти.

Наступне дофiнансуваня для Ґорлиц

9. лютого/фебруара в Новым Санчы бургомайстер Ґорлиц, Рафал Кукля, одобрал офiцийный документ потверджаючый дофiнансуваня проєкту «Розвиток i ремонт зеленых зон Мiста Ґорлицi», якiй буде реализуваный в рамках проґраму Европейскы Фонды для Малопольщы 2021-2027. Подля сесого проєкту в центрi мicта, а головнi в рынку мают быти посаджены новы рослины, поставлены елементы малой архiтектуры, створена теренова мiнiсцена, а тiж iнчы просторы для стрiч i орґанiзациi локальных подiй. Проєкт был акцептуваный 27. сiчня/януара 2026 р. i завдякы ньому мiсто отримат близко 7 млн на модернiзацию.

Лемковина Вiнтер Трейль

28. лютого/фебруара одбуде ся шеста едиция Лемковина Вiнтер Трейль. Тым разом мiсцьом, котре буде гостило любителiв бiганя, є Івонич-Здрій. Як iнформуют орґанiзаторы, тоты, котры хотят провiрити своi силы, а при тым познати красу i новы закутины Лемковины, можут то зробити на трьох трасах i дистансах – 18 км, 33 км i 50 км. Веце iнформаций для тых, котры мают в плянах брати участ або підтримувати участникiв на мiсци, находит на сайтi подii.

Вiкенд Материньского Языка в музею Полiн

21. лютого/фебруара празднуваный є Медженародный Ден Материньского Языка. З той нагоды Музей Iсториi Польскых Жыдiв Полiн просит на вiкенд присвяченый материньскому языкови. Каждый, хто приде, буде мал нагоду стрiтити ся з рiжныма языками, напримiр, єврейскым, вєтнамскым i вельома iнчыма, в тым польскым жестовым языком, в котрым ведена буде єдна з прогульок по часовiй выставi «Сила слiв». Цiлый вiкенд ведены будут варштаты для родин, прогулькы по выставi, а тiж тематичны стрiчы-бесiды. В суботу, 21. лютого/фебруара пройде дискусия пн. «Межде языками. О тым, што гвариме – i кым ся стаєме» – о тым, ци выбiр языка може быти деклярацийом достоменности. В недiлю, 22. лютого/фебруара музей просит на стрiчу пн. «В якым языку биє серце?». В бесіді участ возмут представникы кашебской, шлезской і лемківской спільноты. Лемків репрезентувал буде редактор нашого радия – Демко Трохановскiй. Веце деталiв на тему Вiкенду Материньского Языка найдете на сторонi музею Полiн.

Фотоґрафiя: https://polin.pl/pl/wydarzenie/weekend-jezyka-ojczystego