Сумар дня на 17. лютого/фебруара 2026 р.

Приносиме вам сумар медияльной ґрупы ЛЕМ.фм+ на ден 17. лютого/фебруара 2026 р.

Вмер Юрий Ґавула (1942-2026)

13. лютого/фебруара вмер Юрий Ґавула. Мал 83 рокы. Ґавула народил ся 13. квiтня/апріля 1942 р. в русиньскым селi Чабины, в окресі Меджелабірці, на Словациi. Был выдатным рiзбяром, якiй в своiй творчости занимал ся предовшыткым монументальныма формами. Перiодом його найвекшой артистичной активности была друга половина XX ст., а його творы мож днес найти в цілій Словациi, м.iн. в Словацкiй Нацийональній Ґалериi в Братиславі, во Східньословацкiй Ґалериi в Кошыцях ци Крайскiй Ґалериi в Пряшовi. В 2022 р. выдана была книжка посвячена працы Ґавула пн. «Лікуваня рiзбами: Юрий Ґавула і його творчiст для архітектуры». Похоронны обряды артисты одбудут ся в Братиславі, а урна Ґавула буде уложена до родинного гробу в Чабинах. Вічна памят!

Выстава прац Зофii Стриєньской

16. лютого/фебруара в Музею Тарнiвской Землi одбыл ся вернiсаж выставы «Зофiя Стриєньска. Медже вiром а обрядом». На експозициi, котра буде доступна до 16. мая 2026 р., запрезентуваны сут образы i ґрафiкы артисткы з колекциi зобраной отцьом проф. Алойзийом Францішком Носальом, яка была дарувана Музейови Тарнiвской Землi. В тiй збiрцi находят ся 33 роботы створены головнi в 30. i 60. роках XX ст. Выстава зосереджат ся на основным сюжетi в працы Стриєньской – народнiй культурi, в значыню мiсця стрiчы вiры, обряду i штоденности. Окрем творiв Стриєньской на выставi запрезентуваны сут тiж етноґрафiчны експонаты i народне облечыня, якы мают помочы зрозумiти i дополнити культуровый контекст, в якым выросла артистка. Выстава вписує ся в святкуваня 135. рiчницi народин i 50. рiчницi смерти Стриєньской. Вступ на выставу є безплатный.

Лiсове моло в Вапенным

16. лютого/фебруара на сайтi ґмiны Санкова опубликуваны были офiцияльны вiзуализациi новой iнвестициi – стежкы в коронах дерев, называной тiж лiсовым моло, яка мат быти побудувана на cхылi Малого Фердля. Конструкция мат быти, коло видоковой вежы, наступном атракцийом, завдякы котрiй мож буде обзерати панораму Низкого Бескіду i сусiднiх гiрскых пасм. В рамках проєкту плянуваны сут тiж: перебудова амфiтеатру, модернiзация солянковой інгаляториі, нова част загорід i новы просторы для наймолодшых. Речена розбудова є дальшом з вельох iнвестиций, якы од 2019 р. ґмiна Санкова веде на теренi Вапенного – найменшого курорту в Полщы. Довєдна ремонты парку вынесут близко 10 млн злотых. Працы над найновшыма iнновациями мают ся зачати в наступным роцi, а iх результаты значучо підтримают туристичну сторону реґiону.

1,5% податку на лемкiвскы орґанiзациi

Припоминаме, што од 15. лютого/фебруара можеме уж розраховувати нашы ПIТ-ы за минулый, 2025 рiк. Потенцияльнi заiнтересуваным передаєме, што в тым роцi 1,5% податку можеме переказати, як дознали сме ся з социяльных сіти, на будову православной церкви в Ґладышовi або на дiяльнiст Лемківского Ансамблю Пісні і Танця «Кычера». Веце iнформаций на тоту тему найдете нп. на фейсбуковых профiлях тых орґанiзаций. Зазначаме, што рiшыня о переказаню 1,5% податку є добровiльне і залежыт лем од податника, котрый може вказати выбраный субєкт в своiм розрахунку. Час, жебы розрахувати ПIТ, маме до 30. квiтня/апріля.

Фотоґрафiя: https://muzeum.tarnow.pl/index.php/pl/node/1297