Сумар дня на 3. марця 2026 р.

Приносиме вам сумар медияльной ґрупы ЛЕМ.фм+ на ден 3. марця 2026 р.

Траґедия на Ляцковi

Як iнформує креницка ґрупа GOPR, послiднiй сонечный вiкенд был iдеальном нагодом для гiрскых вандрiвок i спортовых активности. Был тiж часом парунадцетьох выпадкiв, а при тым iнтервенций той ґрупы. Найбарже траґічна ситуация прошла в суботу 28. лютого/фебруара на схылi Ляцковой в Бескідi, де туристка, котра входила на верх, впала з ок. 20 метрiв i понесла серіозны раны. Помiч появиля ся скоро, але, на жаль, 2. марця жена вмерла в шпытали в Ґорлицях. Передаючы тоту iнформацию, GOPR припоминат, што змiна погоды не означат полной змiны условiй в теренi. В высшых гiрскых одтинках фурт є снiг i лед, а в низшых болото, зас вшытко то є потенцияльным загорожыньом i прото треба быти осторожным.

Пожары i квестия выпаляных трав 

Послiднiй вiкенд 27. лютого/фебруара – 1 марця был тiж iнтенсивным часом для огньовой стражы, котру 10 разів кликали до пожарiв трав. Зголошыня были нотуваны в ґмiнах Бiч, Ґорлицi i Липинкы. З той причыны, же травы были выпаляны, а не были то припадковы ситуациi, пожарникы припоминают, што за такы дiяня, котры офiцийнi сут беззаконны, можеме отриматы высокы мандаты, бо од 5 до 30 тисячів злотых, а в припадку, кєд спричыниме загорожыня для iнчых люди, горозит і кара вязниці.

Неодплатна правна помiч в ґорлицкым повiтi

Староство Повiтове в Ґорлицях оголосило дрiбницi тыкаючы неодплатной правной помочы в повiтi на 2026 р. В сесым роцi таку помiч будут давати в штырьох пунктах: в Бiчы, Ґорлицях, Бобовiй i Криґу, де перенесеный є пункт, котрый дотепер фунґувал в Лоси. Реґiстрация на пораду одбыват ся через телефон або онляйн. Неодплатну правну помiч можут отримати тоты, котры не сут в силi оплатити таку услугу, а тiж особы, котры ведут єдноособову економічну дiяльнiст. Веце iнформаций на тоту тему найдете на сторонi Староства.

Наука языка i культуры для дiти з етнiчных i нацийональных меншын

Мiнiстерство Нацийональной Едукациi змiнило термiны на подаваня внескiв на занятя для дiти з етнiчных i нацийональных меншын. Дотепер вшыткы внескы приниманы были до 20. вересня/септембра. В тым роцi введены сут новы даты, тзн. до 31. марця документы складают опiкуны дiти, якы мают продолжати вчыня, а до 31. липця/юлия опiкуны дiти, якы iдут до передшколя, значыт рiк до переду. Право до наукы мают дiти, котры сут громадянами Польщы, а тiж членами меншыны, якой языка хотят ся вчыти. Жебы орґанiзувати занятя старчыт троє ученикiв, а як в конкретнiй школi або ґмiнi неє iщы пункту вчыня, то тепер мож го створити. Звертаме увагу, што першый термiн о продолжыня вчыня кiнчыт ся уж в тым мicяци.

Фольклорны фестiвалi того лiта

На своiм фейсбуковым профiли Медженародный Фольклористичный Фестiваль «Свiт пiд Кычером» оголосил, што тогорiчна 29. едиция iмпрезы буде одбывала ся в днях од 26. червця/юнія до 6. липця/юлия. На фестiвальовым пути мают ся найти новы мiсцевости, а дальшы iнформациi будут ся появляти на фейсбуковiй сторонi «Свiта пiд Кычером». По фестiвали мож поiхати і на полудне за Попрад до Малого Липника на ювілейну 15. Русиньску Ватру, котра плянувана є на 10.-12. липця/юлия. На сам конец можеме перенести ся на схiд Словациi, до Улича, де 17. i 18. липця/юлия проходил буде 57. Фестіваль Русиньской Культуры «Еха Волчых Гір». О дальшых фольклорных фестiвалях будеме iнформувати внет.