Сумар дня на 25. марця 2026 р.

Приносиме вам сумар медияльной ґрупы ЛЕМ.фм+ на ден 24. марця 2026 р.

Шторічна стріча бурсаків

В найблизшу суботу 28. марця одбуде ся загальне зобраня членів Стоваришыня «Руска Бурса» в Ґорлицях. То шторічна стріча, на котрій підсумовує ся діяльніст общества за попередній рік. Бурсакам будут представлены справописы (мериторичный, фінансовый і од Ревізийной Комісиі), а пак члены стоваришыня будут рішати, ци дати абсолюторию одходячому зарядови, веденому в миняючій каденциі Наталийом Малецком-Новак. Попри важности фінансовых справописів, котры для каждой інституциі сут обовязком, в меншыновых обставинах основном остає штоденна діяльніст, якой підсумуваня і результаты найдут ся в мериторичным справописі. На засіданю будут так само порушены актуальны справы і ведены проєкты, але і тото, што орґанізация плянує в близшым і дальшым часі. Цілю засіданя буде тіж накрислити текучы і будучы проблемы, а тіж выбрати новы власти орґанізациі.

Мож уж переіхати дорогом Санкова-Розділя

20. марця одбыло ся офіцийне одобраня інвестициі зреализуваной Ґорлицкым Повітом – іде о новый міст, котрый находит ся на повітовій дорозі но 1489К Санкова-Розділя. В одбераню участ взяли: ґорлицкій староста Мірослав Вальонґ, його заступця Марцін Кжеміньскій, член заряду повіту Марек Людвін, війт ґміны Санкова Малґожата Малух, заступця війта Михал Дідух та представникы выконавчой фірмы. Ціла задача обнимала найперше розобраня одтинка повітовой дорогы, попереднього мосту та будову нового з доіздовыма одтинками дорогы. Кошт той задачы то понад 3 млн 100 тис. зл. Повіт здобыл дофінансуваня 1,5 млн зл на реализацию нового мосту в рамках резервы загальной субвенциі. Ґміна Санкова зо свого буджету доложыла 400 тис. зл.

В Новым Саді презентували русиньскы книжкы

Од 17. до 23. марця в Новым Саді проходил Медженародный Торг Книжок 2026. То подія з тридцетлітньом історийом, яка пропаґує писане слово, літературу і уменя. Як традицийні на торгах презнтуваны были тіж русиньскы выдавництва – о нашых публикациях бесідувано аж три дни. Як перша з выдавництвами запрезетнувала ся з белетристиком, есеістиком і науковом публицистиком орґанізация Руска Матка. Своі выданя в інчый ден презентували пак Новинарско-выдавнича Інституция Рускє Слово та Інститут про Культуру Войводиньскых Русинів. Як послідній новы выданя презентувал Інститут про Русиньскій Язык, Літературу і Культуру. На торгах презентуваных было парунадцет русиньскых книжок, але чысло тото і так не обнимат вшыткых новых выдань бачваньскых Русинів. Для порівнаня – в Польщы в 2025 році лемківскы орґанізациі выдали 6 публикаций.

Просиме н варштаты малюваня яєц до Бурсы

Припоминаме, што уж в найблизшу неділю, 29. марця, в Рускій Бурсі в Ґорлицях одбудут ся варштаты малюваня яєц. Традицийні стрічаме ся в Квітну Неділю, але тым разом – за григорияньскым календарьом. Варштаты зачнут ся о 15.00 год. Орґанізаторы забезпечают материялы – будут на Вас чекати: зварены яйця, фарбы і воск до малюваня. Вчас спільной стрічы продолжана буде традиция рыхтуваня великодніх писанок батіковом методом – розтопленый воск наносит ся на верхню верству яйця, хоснуючы метальовый писалец з головком. Вступне очывидно дармо. Красні просиме!