Сумар дня на 31. марця 2026 р.
Приносиме вам сумар медияльной ґрупы ЛЕМ.фм+ на ден 31. марця 2026 р.
Новы цiны бензины
В понедiльок 30. марця в Польскым Монiторi Мiнiстер Енерґii – Мiлош Мотыка – оголосил розпоряджыня в справi максимальных цiн продажы палив, котры будут актуальны на час зниженого податку VAT i акцизы. Подля закону новы цiны обовязуют од наступного робочого дня, в тым припадi од днеска – 31. марця 2026 р. Згiднi з тым за бензину тзв. 95 заплатиме максимальнi 6,16 зл/л, за 98 максимальнi 6,76 зл/л, а цiна за Diesel вынесе 7,60 зл/л. Во вшыткы тоты цiны врахуваный є уж податок. Контролi над продавцями мат вести Державна Скарбова Адмiнiстрация. В ситуациii продажы палива дорожше, як наказує рiшыня, мiнiстра горозит 1 млн зл кары.
Заказ хоснуваня телефонiв в школах
Проєкт уставы, якiй ся тыкат хоснуваня телефонiв в школах, вкiнци дочекал ся якісых крокiв в сторону його розвитку. Мiнiстер Едукациi, Барбара Новацка, передала тот проєкт до публичных консультаций, то значыт, через 30 дни, до 23. квiтня/апріля 2026 р., каждый, хто є заiнтересуваный том темом, може выразити свою опiню i переслати ю на почтовый адрес: konsultacje.dk@men.gov.pl. Дотепер офiцийнi не обовязує ниякiй конкретный заказ хоснуваня телефонiв, прото тота устава мала бы дати школам такє право i нарядя го еґзеквувати. Подля науковых дослiджынь мало бы то влияти лем на хосен ученикiв, на iх едукацию, психiчне здоровля ци соспiльны реляциi. Введiня проєкту уставы є плянуване на 1. вересня/септембра 2026 р. Цiлый проєкт, зо вшыткыма iнформациями на його тему є доступный на Урдовым Леґiсляцийным Портали.
Уряд до Справ Цибербезпекы остерiгат перед атаками
Представник Уряду до Справ Цибербезпекы остерiгат перед змiцненыма атаками. В перiодi позрахувань податкiв i введiня Державной Системы е-Фактур ґрупы циберпереступців подают ся за Мiнiстерство Фiнансiв, а тiж Державну Скарбову Адмiнiстрацию. Тым способом прiбуют отримати даны лоґуваня, найчастiйше до сервісу Profil Zaufany. Iстнує шор дiянь, якы можеме пiдняти, жебы ся забезпечыти перед ошустами, а тiж діянь, якы треба пiдняти, кєд нашы даны будут вкрадены. Веце iнформаций на тоту тему находит ся на сторонi Мiнiстерства Цифризациi.
XXI сесия Рады Ґорлицкого Повiту
26. марця проходила XXI сесия Рады Ґорлицкого Повiту, якой головным пунктом была оцiна реализациi задач звязаных з безпеком i утриманьом публичного порядку на теренах повiту. В стрiчы брали участ урядникы, представникы мундуровых служб i iнституций, якы одповiдают за безпеку жытелiв. Выголосили они справописы зо своiх прац. I так, подля тых iнформаций, в Ґорлицкым Повiтi в минулым, 2025 роцi, нотувано нп.:
– в обшыри роботы полiциi: більше як 1500 переступств; близко 20 тис. iнтервенций полiциi; більше як 33 тис. порушыня закону; 27 выпадкiв на дорогах, 525 колiзий i більше як 300 пияных шоферiв,
– в обшыри роботы протиогньовой стражы: більше як 1500 iнтервенций стражы, в тым веце як 300 пожарiв, понад 500 iнтервенций звязаных з атмосферичныма явисками,
– в обшыри роботы Санiтарного Iнспекторату: 533 припадкы COVID-19, 655 оспы, 277 борелiозы i 20 припадкiв сухот,
– в обшыри роботы ветеринария: близко 150 припадків контролi в ґаздiвках, де триманы сут звiрята, в тым 13 припадкiв занедбаня условiй жытя звiрят; понад 120 iнтервенцийных контролi, якы были ефектом зголошынь, в тым 84 припадкы занедбаня условiй жытя звiрят.
Окрем того Рада приняла пару схвалінь, в тым два, котры ся тыкают фiнансiв повiту. Полны iнформациi на тоту тему находят ся на сторонi повiту, протокiл цiлой сесиi буде доступный в Бюрi Публичной Iнформациi Ґорлицкого Повiту.
Повязаны дописы
Ґорлиці 106,6 MHz
Наш порталь можете чытати чысто дармо, але кєд маш охоту - можеш нас спомочы. Буде нам барз мило!
Жебы спомочы нас даком вплатом, без ниякых зобовязань, втисний притиск або зоскануй код QR.
Nasz portal jest darmowy, nie mamy (i nie chcemy) na nim reklam. Jeżeli masz ochotę - możesz wesprzeć naszą codzienną pracę.
Aby wspomóc nas jednorazową wpłatą, bez żadnych zobowiązań, kliknij przycisk lub zeskanuj kod QR.
