«Слово» – Квітна неділя – неділя, 9.00 год.

Пережыли сьме з Божов благодатьов святу добу Чотыридесятніці. В яятніцю вечур сьме уж співали: Душеполезную совершивше чотыридесятніцу. Кедь сьме завершыли душехосенну Чотыридесятніцю. А вступуєме до другой частины святого посту, до Страстного тыждня.

Але іщі перед тым нам св. Церьков в суботу і неділю говорить о вызначных подіях, котры ся одбыли пред самым Страстным тыждньом. А то,  вчера сьме чули о воскресіню Лазаря, котрый уж быв штири дні в гробі.

Ісус приходить до Віфтанії і його піднимать з гроба. Давать наказ одвалити камінь а закричіть, Лазарю подь вон. А Лазарь повязаный на руках і ногах вышов із гроба. Тота подія притягла уважность многых, бо якраз в тім часі сходили ся Жыды до Єрусалима на праздник Пасхы. А так многы хотіли прийти і увидіти Лазаря.

А днешна неділя говорить о далшій події, коли Ісус торжественно вступує до Єрусалима. Народы надхнено Йому кричать на славу. То усвідомліня, што ся стало. Тото велике чудесне діло. Задіяло на народ. Думали собі, коли він таке докаже зробити, мертвого привести ку жывоту по штирьох днях у гробі, та то істо буде тот обіцяный Месія. Він іде перевзяти царьство. Про нього не є ниякой людьской перешкоды. Легко переможе неприятелів. Выжене Римлянів. Бог наповнив свої обіцянкы.

Но і самы апостоли дали ся унести тов атмосферов, надхнено ся придавають ку множеству народа і думають собі, та істо Він іде перевзяти владу в Єрусалимі. А мы, котры так близко Нього, будеме мати вызначны поставліня.

Таке было очекованя народа і самых учеників. Но Ісус не смотрить на людьскы очекованя. Він бере ослятко, на котре собі сів, жебы выповнив слова пророків. Принимать од народа похвалы, але не про їх земны погляды, але уж видить тоту побіду, котру хоче подаровати людьству.

Приходить не як земный царь – завойователь, но приходить установити духовне царьство. Перемочі тых духовных неприятелів. Не способом земных царів зо збройов. Але через покору, понижіня, терпіня і смерть. Бо приходить зничіти владу діавола, смерти і гріха. Приходить отворити людям Царьство небесне, вічне, блаженость, котру не мож описати.

Но народ мать іншы очекованя. А коли ся не наповнили, тот самый народ буде о пару днів кричати: На крест із ним, не маме царя, лем цісаря.

Дорогы радіослухачі, днешня неділя нас позывать ку правдивій радости з того, што нам Бог іде даровати – вічный жывот, Небесне царьство. Но днешня неділя є тыж напомянутьом: Народ мав очекованя, коли ся не наповнило, одпали. Тото може быти і з нами. І мы можеме мати очекованя од Бога, а як ся не наповнять… кілько одпаде од молитвы, Церькви, бо Бог не дав то і то, або не зробив так і так, або став ся опак того.

Быти при Хрістови, коли кричать осана, то є барз легко. Но быти з Ним і тогды, коли кричать на крест, выжадує уж велику віру. Но і за тов віров наслідує велика нагорода. Слава Ісусу Хрісту!

В неділю, 5. апріля 2026 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 5. апріля 2026 р. о 12.00 год. і 6. апріля 2026 р. о 2.00 год. за русиньскым часом.