Сумар дня на 7. квітня 2026 р.

Приносиме вам сумар медияльной ґрупы ЛЕМ.фм+ на ден 7. квітня 2026 р.

О меншынах в Братиславі  – другє засіданя Палаты Нацийональных Меншын

1. квiтня/апріля в Братиславі одбыло ся другє засіданя Палаты Нацийональных Меншын Рады Влады Словацкой Республикы про нацийональны меншыны. Засіданя вюл председа – Мілян Ян Піліп, представник русиньской меншыны. Присутный был тіж репрезентант влады Словацкой Республикы за нацийональны меншыны – Акош Горонь. Члены Палаты бесiдували о нацийональных музеях, Фондi на Підпору Культуры Нацийональных Меншын, системi освіты i о меншыновых медиях в Словацкій Телевізиі і Радию.

Як iде о музеi, головным проблемом є тото, хто поведе Музей Русиньской Культуры в Пряшовi. По веце як пятьох місяцях од одкликаня Любы Кральовой не был выписаный конкурс на директора той інституциі. Бесідували і о фiнансовых пiдпорах i ґуральскiй меншынi, яка уж в минулым роцi была офiцийнi принята як нацийональна меншына, а дотепер не была введена новелизация закону о фонді, завдякы котрiй Ґуралі могли бы вполни хоснувати своi меншыновы права в тiй сферi. Фурт жыва є бесiда о хыбах в системi едукациi, а предовшыткым о браку материялiв до вчыня меншын на Словациі – од 2012 р. не был выданый ниякій підручник для русиньскых дiти. Проблемы являют ся тiж в медияльнiй сферi, а точнiйше iде о передачу меншыновых проґрамiв, котра є несистематична i замiшана, што влият безпосередньо на тото, ци люде дальше хотят таку телевiзию обзерати i такє радийо слухати.

Продолжыня тых тем буде пiдняте на наступным засiданю Рады Влады Словацкой Республикы, котре одбуде ся в маю.

Пшемківскiй Осередок Культуры і Бібліотекы мат нового директора

Од 3. квітня/апріля новым директором Пшемківского Осередка Культуры і Бібліотекы стал Данько Горощак. На функциі заступил попередню ведучу – Боґумілу Орнатовску-Ціхошевску, яка завідувала ПОКіБ од 2006 р. На трилітню каденцию офіцийнi покликал го бургомайстер Пшемкова – Єжы Щупак. Данько Горощак то локальный активіста, якiй од років діє при лемківскых проєктах. Од молодых років был заанґажуваный в діяльніст Лемківского Ансамблю Пісні і Танця «Ластівочка». Дотепер продолжат спілпрацу з колективом, є тіж редактором «Радіо Лемко», для котрого творит ріжны авдициі. Перше робил в другых інституциях культуры – Шпротавскым Культурным Домі, Центрi Культуры в Польковицях, а тіж спілпрацувал з Центром Творчых Діянь в Любіні, де в посліднім часі спілреализувал цикль подій – «Лемкы в Центрі».

Семiнария для учытелiв лемкiвского языка

Директор Повiтового Осередка Методичного Дорадства в Польковицях, Вєслав Ксенич, просит учытелiв лемкiвского языка на семiнарию пн. «Лемкiвскiй язык – сучасны технолоґii в методицi». Цiлю той стрiчы є пошыряти методичны компетенциi учытелiв меншыновых языкiв завдякы вказаню модерных цифровых iнструментiв, якы мож хоснувати для вчыня ци творiня материялiв. Семiнарию буде вела Дорота Максимчак. Занятя сут безплатны i одбудут ся 22. квітня/апріля в будинку школы в Радваницях. Свою участ мож зголошати до 17. квітня/апріля. Веце iнформаций найдете гев.

Онляйн стрiча нт. «Контекстуального словника лемкiвского языка»

20. квітня/апріля в понедiльок о 10.00 год. буде онляйн семiнария посвячена «Контекстуальному словникови лемкiвского языка». Стрiчу орґанiзує International Committee of Slavists i Slavic-Eurasian Research Center. Участ в дискусиi возмут: редакторка словника – др габ. Олена Дуць-Файфер, проф. Генрик Фонтаньскiй i др габ. Томаш Вiхеркєвич. Жебы мочы долучыти до стрiчы на Zoom, треба ся зареґiструвати при помочы мотузка.