Сумар дня на 20. мая 2026 р.

Приносиме вам сумар медияльной ґрупы ЛЕМ.фм+ на ден 20. мая 2026 р.

Нацийональне свято Русинів в Хорвациі

В неділю 24. мая в Вуковарі одбуде ся торжественна подія з нагоды Дня Русинів Хорватсой Республикы. В проґрамі пополудньовой стрічы в Хорватскым Домі Вуковар находит ся вернісаж выставы ікон о. Михайла Йосафата Гарді «Моє жытя днес і на все«, пак будут проходити выступы. Ден Русинів Хорвациі одбуде ся під покровительством Совіту за Нацийональны Меншыны Хорвациі, Міністерства Наукы і Вчыня Хорвациі, Союзу Русинів Хорвациі і Хорватского Дому Вуковар.

В Бортным одбыла ся конференция православного духовеньства

В суботу 16. мая в Бортным одбыла ся дорічна конференция духовенства православной перемышльско-ґорлицкой єпархіі. Конференцию попередило богослужыня, котре очелювал Його Высокопреосвященство владыка Паісий, архієпископ перемышльско-ґорлицкій, в асисті духовенства. Підчас літургіі архієпископ Паісий рукоположыл нового священника – о. Лукаша Копчу. На конференциі выголошены были справописы з жытя єпархіі і поєдных деканатів, а тіж Єпархіяльного Осередка Православной Культуры «Ельпіс» в Ґорлицях, Єпархіяльного Осередка Милосердя «Елеос» в Ґладышові ци діяльности єпархіяльного братства православной молодежы. Принято проґрам святкуваня 100-літя повороту Лемків до Православія, ближучых поломництв, а тіж омовлено справы жытя єпархіі, особливо будовы новых храмів – в Ґладышові і на Горі Явір. Підчас конференциі рефераты выголосили тіж архієпископ Паісий та о. прот. Михал Коник.

Буде мож достати грошы на популяризацию знаня о меншынах посередництвом сайтів типу Facebook, Instagram ци TikTok.

Іщы до 28. мая мож складати оферты в рамках додаткового набору на реализацию задач, котрых цілю є охорона, захованя і розвиток культурной достоменности нацийональных і етнічных меншын в Польщы. Дотациі признає Міністер Внутрішніх Справ і Адміністрациі. Як подано в оголошыню – преферуваны будут оферты задач, котрых головным результатом буде популяризация – в модерній діґітальній формі (особливо зо схоснуваньом соспільных медий) материялів авдийо або авдийовідео о высокых едукацийных приметах. Цілю короткых форм відео має быти популяризация знаня о меншынах і реґіональным языку і іх шырока дистрибуция та доступніст по закінчыню реализациі задачы. Інформация о признаню дотациі явит ся на сайті Міністра Внутрішніх Справ і Адміністрациі найпізнійше 3. липця/юлия того рока.

Фурт тырват набір охочых на мешканя в Санковій

Ґміна Санкова продолжат набір внесків до проґраму Соспільной Мешканьовой Ініциятивы. Заінтересуваны арендуваньом новых мешкань мают тепер веце часу – документы мож складати до 19. червця/юнія 2026 рока. Припомнийме, што в рамках інвестициі выбудуваных буде 40 мешкань перезначеных під аренду з можливістю выкупліня. Мешканя будут выкінчены «під ключ» і готовы до замешканя. Внескы треба складати в Уряді Ґміні Санкова. Оферта кєрувана єст до осіб, котры не мают свого мешканя і сполняют окрислены критериі, што тыкают доходу. Веце інформаций найдете на вебсайті ґміны Санкова.