«Слово» – Неділя вшыткых святых – неділя, 9.00 год.

Днешня неділя, котра ся называть Неділя вшыткых святых, завершує час Квітной тріоді. То є літурґічный час од праздника Лазарьовой суботы до Приходу Святого Духа.

Коли чуєме словко святость, може нам прийде на розум даякый святый із нашого літурґічного календаря. Бо на каждый день маме даякого святого. А собі представиме чоловіка, котрый быв уж ту на землі близко Бога. Но, при думці, же слово сятость ся мать односити і на мене, то уж є про нас штось далеке і высоке. Іщі сі може повіме, то може платити о монахах, священиках, но што я просртый чоловік а святый, то не іде довєдна

Но Боже слово нам на многых місцях припоминать вшыткым: Будьте святы, бо Я єм святый. І на Службі Божі перед часом св. Причаща чуєме слова: Святая святым! А што говорить слово днешньой неділі? Ісус нам давать такы інштрукції ку святости. хто ся приголосить ку мі меджі тым грішным і чуджоложным поколіньом, ку тому ся і я зголошу перед своїм Отцьом, перед вшыткыма ангелами. Но, хто ся одрече мене, та і я ся го одречу в тот день. То є в день Страшного суду.

Тото слово нам говорить, же святость значіть быти все з Хрістосм. Поставити Його до центра свого жывота. А то не лем в легкых добах, коли вшытко є легко, коли то од нас не вымагать даякой жертвы. Но і тогды, коли за признаня ся ку Хрістови грозять санкції пронаслідованя, проблемы з міцныма того світа а може мукы і пролатя кровли. А і тогды перебыти з Хрістом в певній вірі, не дати ся заколысати ани обіцянками славы, богатства, ани муками а тепріньом. Бо тото вшытко є дочасне.

А Ісус дале говорить: Хто любить отця, матірь, жену, мужа, діти веце як мене, не є мене достойный. Хто не бере свій крест а мене не наслідує, не є мене достойный. Тогды апостол Петро сміло повів: Смоть, мы вшытко охабили а ішли за Тобов. А Ісус йому говорить: Не є никого, хто бы охабив вшытко а не дістав стораз веце уж ту а в вічности вічный жывот. На першім місці ся односить ку тым, котры чули в собі то покликаня наслідовати доконало Хріста як священикы, монахы.

Но тото слово є глубше. Односить ся ку каждому. І ку тому, котрый жыє в манжелстві, мать дітей, ці є робітник, політік, професор, учітель, вояк. Ку каждому звучіть то слово о святости. Св. Василій нам подавать два прінціпы, котры пояснюють то днешнє слово: а то Вшытко робте на Божу славу а вшытко робте на Божых очах. Два прінціпы, котры можеме вшыткы прияти а прямовати ку святости.

Днешній день прославляме тых, котры нас спередили, котры наповнили тоты слова: быти все з Хрістом а жыти в каждій сітуації на славу Божу, повнити Божу волю. А церьков указує нам їх приклад і про нас. Бо і они ку нам днесь голосять: І вы, котры нас прославяте на землі, сьте так само покликаны быти святыма: Поставити Хріста на перше місце у своїм жывоті там, де ся находите, жыти на Його славу, перебывати в Його притомности а быти приготовлены за Нього прияти і тепріня, пронаслідованя і смерть. Слава Ісусу Хрісту!

В неділю, 7. юна 2026 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 7. юна 2026 р. о 12.00 год. і 8. юна 2026 р. о 2.00 год. за русиньскым часом.