Русины на Словакії одсвяткують своє свято і 35 років СКР

В днях 12-го аж 14-го юна 2026-го року Меджілабірці стануть головным центром русиньского общественного, културного і духовного жывота на Словакії.

Русиньска оброда на Словеньску (РОС) у сполупраці із Світовым конґресом Русинів (СКР), Світовов радов Русинів (СРР), містом Меджілабірці і далшыма партнерами приготовлює цілонародне святкованя Дня Русинів Словакії, котры будуть споєны із припомянутьом вызначного юбілея – 35-ой рочніці основаня СКР. Якраз Меджілабірці суть місцьом, де у 1991-ім році одбыв ся історічно першый Світовый конґрес Русинів.

Проґрам святковань почне 12-го юна. Вечур о 19.30 год. в просторах АРТ Готела одбуде ся бісіда під назвов Прямы участници І. Світового конґресу Русинів в Меджілабірцях, почас котрой ся вернеме ку атмосфері і діям історічного конґресу з року 1991. Наслідно буде пририхтованый сполоченьскый вечур, котрый вытворить простор на неформалны стрічі і спомины.

В собуту о 9.00 год. в засідалні Містьского уряду одбуде ся конференція під назвов 35 років Світового конґресу Русинів. Конференція присвячена історії, значіню і перспектівам русиньского меджінародного руху принесе погляды памятників, фаховців і представителів русиньскых орґанізацій із веце держав.

Пополідне о 15.00 год. участници стрітять ся перед Містьскым урядом на пієтнім акті, наслідно перейдуть містом з кройованов процесійов. О 16.00 год. на містнім амфітеатрі буде проходити Ґалапроґрам цілонародных святковань Дня Русинів Словакії. Проґрам представить богатство русиньской културы, музикы, співу, танця і традіцій.

О 20.30 в Домі дітей святого Николая буде промітаня філму Потопа, а так само одбуде ся і стріча з творцями і акторами. Запрошіня прияли і Сара Хрипакова а Володимір Чема, котры у філмі грають.

Недільный проґрам завершыть ся святочным засіданьом СРР і участьов русиньскых представителів на Божественній літурґії.

Орґанізаторы позывають вшыткых Русинів, любителів русиньской културы, фолклору, історії і традіцій, як і шыроку публіку, жебы пришли на тоту вызначну подію і вєдно так одсвятковали День Русинів Словакії і 35-ту рочніцю СКР.

Автор: Мартін Караш