«Слово» – 3-тя неділя по Сошетствії Святого Духа – неділя, 9.00 год.

Господь наш Ісус Хрістос говорить в днешнім слові: Світилом про тіло є око. Кедь то око буде світле, та і ціле тіло буде у світлі. Но кедь буде темне, та і ціле тіло буде в темноті. А кедь уж то, што про тя світилом є темнотов, то яка буде сама темнота?

Тоты слова суть барз важны і про нас. Бо кедь ідеме до ґрецького тексту, там є інше слово. Кедь твоє око буде лукаве (ґр. понірос), то штось барз плане, діавольске. Но кедь останеме лем на тім тілеснім оку, тогды дійдеме до того, же око є як тота частинка людьского тіла была сотворена як лукава? Кедь Боже слово говорить, же вшытко што Бог сотворив є добре.

Ту видиме, же Ісус говорить о внутрішнім оку душі, котре чоловік приймать рішіньом свойой волі. Може мати тото образно повіджено Боже око, як пише апостол Павел: Мы маме мысель Хріста. Або може мати то діавольске око. Смотрити на тот світ через діавольскый погляд гріха, роскоші, пожадливости. Зато далше говорить: не старайте ся вашов душов, што будете їсти, што будете пити або до чого ся облечете. Ісус говорить о тій непотребній старости [ґр. мерімна), котра краде чоловіку тоту потребну старость о свою душу.

А давать приклады: посмотьте на небесны птахы, як они собі жыють, не сіють, не жнуть ани до сыпанців не зберають, а Ваш Отець небесниый їх жывить. Ісус не говорить: нич не робте, вшытко дістанете без намаганя. Бо коли указує на птахы небесны, там видиме діалность, як они собі выглядавають корм, як літають, не перебывають в лінивости. За то Ісус говорить не старайте ся вашов дуошв. Не повнийте вашу душу тыма непотребныма старостями, котры одводять ваш погляд од неба ку землі, од Совторителя ку сотворіню.

Тыж указує на лелії, на квіточкы, котры піднимають ся над іншы свойов красотов. Говорить: посмотьте на кажду із них, як не старають ся о своє облечіня, але Ваш Отець їх облікать. А ани Соломон у цілій своїй славі не быв так облеченый як єдна з них. Прирівнавать єдну квіточку ку славі Соломона. Соломон быв царь, быв сыном Давіда. А перед тым як зачав царьовати в Ізарілю просив собі мудрость од Бога, жебы міг добрі владнути. Не просив злато, стрібро ани богатство. А Бог йому повів: зато, же ты просив мудрость, дам ті мудорсть, котру не мав нихто на землі перед тобов. А в часі його панованя Ізраїль быв в покою зо вшыткыма народами. Не вели ся ниякы войны, што можеме видіти за часів його отця Давіда ці перед тым царя Савла.

Коли ставляв храм, поганьскы царі охотно додавали вшытко потребне. З далекых країв приходили слухати мудорость Соломона. А приходили не з порожніма руками. Але як вдячность за познаня такой мудрости, котра была лем о земнім, приношали богатства даного края: злато, стрібро, дорогы матеріалы, коріня.. А так Соломом і його дворяны перебывали у великій славі, облікали ся до прекрасных шмат. А предці Ісус говорить: єдна квіточка є красша, як Соломон в цілій своїй славі. А потім додавать: Кедь Бог тоту траву, видиме, якый розділ, там назвав штось велике, а такой на то – тоту траву, котра з рана заквітне а вечурь спріє і  шмарять до огня, так облікать, та ці тым скорше не вас, маловірны? Жебы тым выздвигнути великость чоловіка, котрый сотвореный на Божый образ і подобу.

А святый Василій додавать у своїм слові: Засмоть ся на себе (ґр. просехе сеавто). Чоловік єдиный твор, котрый смотрить горі. Вшыткы звірятка смотрять долов на жалудок і піджалудок. Чоловік сотвореный, жебы смотрив горі, ку свойому Сотворительови, і мав перед очами ціль свого жывота, небо, вічну славу. Зато Ісус дале нам говорить: Тото вшытко выглядавають погане. То є жыють лем про тіло, смотрять долов, бо діавол їм дав то своє око, жебы не виділи небесне, але жыли лем про земне. Кедь чоловік прийме тото діавольске лукаве око, тогды видить лем предмет, котрый хоче мати.

Так повставають незлагоды в родині, містах, державах, повставають войны. Родить ся то желаня овладати того другого, тым, што він мать, жебы мати з того хосен. Тым, же чоловік одвертать свій погляд од Сотворителя, не видить ани свого ближнього, видить тото лукаве око лем себе свої пожадливости, свої інтересы. Прото нас тото слово напоманить: Ваш Отець знать, же вам тото вшытко треба – то є їдло, напой і шаты. Але вы наперед глядайте Царьство Боже і його справедливость і тото вшытко вам додасть ся.

Прото просьме: Господи, дай нам твоє око, жебы сьме виділи, же Ты наш Сотворитель. Жебы сьме глядали твою славу а памятали, же ты маш вшытко у своїй моци і не зохабиш тых, котры тобі довіряють. А одним од нас то діавольске око, котры нам діавол каждый ден старать вложыти, котре смотрить лем долов як у звіряток на жалудок і піжалудок, а одвертать нас од нашого Отця. Слава Ісусу Хрісту!

В неділю, 21. юна 2026 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 21. юна 2026 р. о 12.00 год. і 22. юна 2026 р. о 2.00 год. за русиньскым часом.