Неодолга світ зас приде до Лемків

Конец червця/юнія і спекота – то лем дві з трьох річы, якы о тій порі рока ся нам пригадуют. Третрьом з них єст тото, што все в оным часі зачынат ся дальша едиция Медженародного Фольклорного Фестівалю «Світ під Кычером».

Не інакше буде того рока – уж о пару дни зачне ся 29. едиция. Першы концерты уж 25. червця/юнія.

На початок місто Ліґниция, де свою сідибу має Лемківскій Ансамбль Пісні і Танця «Кычера». То як раз Ліґниця од років все одкрыват подію, але тіж єст місцьом єй завершыня. Тогорічный фестіваль потырват два тыжні – до 6. липця/юлия.

На карті Нижнього Шлеска лемківска культура враз з культурами другых народів повандрує і по другых місцевостях: до Олесниці, Ґуры, Замениц, Лісця, Польковиц, Поляниці Здрій, Рудной, Желішова, Шпротавы і Ліґницкого Поля.

Toго рока окрем ансамблів з Польщы, тіж тых, што вказуют лемківску культуру, запрезентуют ся артисты з Чіле, Чешской Республикы, Еквадору, Індиі, Ґамбіі, Мексику, Румуніі, Сенеґалю і Украіны. Приіздны колективы в рамках фестівалю выступлят на ґальовых (головных) концертах, а тіж являт серед локальных соспільности, як хоц-бы з выступами в опікунчо-вывохавчых осередках.

Подібні як в попередніх роках, в рамках Фестівалю «Світ під Кычером» одбуде ся Лемківскій Кєрмеш в Заменицях, при тамтышній грекокатолицкій парохіі св. Йоана Крестителя.

Фестіваль то не лем презентация лемківской культуры, але головні плятформа меджекультурного діалоґу і выміны досвідчынь. Участникы будут мати нагоду видіти видовисковы переходы хороводів ансамблів, взяти участ в варштатах выробів ручной роботы і показах та в інтерактивных анімациях, якых задачом буде вказати богатство і розмаітіст світовых традиций.