Сумар дня на 30. червця/юнія 2026 р.

Приносиме вам сумар медияльной ґрупы ЛЕМ.фм+ на ден 30. червця/юнія 2026 р.

25. річниця беатифікациi блаженного Теодора Ромжы

В неділю 28. червця/юнiя в Ужгородскій Грекокатолицкiй Богословскiй Академіi одбыла ся торжественна літургія з нагоды 25. річниці оголошыня за блаженного священномученика Теодора Ромжу, мукачівского єпископа. Головным служытельом был Преосвященный владыка Теодор Мацапула, мукачівскiй єпарха. Вєдно з ним служыли і Преосвященный Владыка Ніль Лущак, помічный мукачівскый єпископ, єпископы русиньской традициi – Высокопреосвященный Владыка Філіп Кочіш, архієпископ і митрополита гайдудорожскiй, голова Мадярской Грекокатолицкой Церкви, і Преосвященный Владыка Мілян Лах, братиславскiй єпарха. Беатифікация блаженного священномученика Теодора Ромжы проходила 27. червця/юнія 2001 р. во Львові, в часi вiзиты Святого Отця Йоана Павла ІІ на Украiні. Праздник блаженного Теодора был перше покликаный на 1. листопада/новембера, на ден, коли вмер, але в 2008 р. на внесок Мукачівской Єпархіi был перенесеный на 31. жолтня/октобра з душпастырскых причын.

«Формы присутности» – закiнчыня

Днеска, 30. червця/юнiя є послiднiй ден выставы «Формы присутности. Штука Лемків/Карпатскых Русинів» в Державным Етноґрафічным Музею в Варшаві. Експозиция была доступна од 17. сiчня/януара тр. i через шiст мiсяців тiшыла ся превеликым заінтересуваньом i привитала тисячы гости з вельох держав. Могли сме на нiй найти роботы так професийных, як і непрофесийных, жыючых i нежыючых артистів з Польщы, Украіны, Словациі, Сербіі, Мадяр ци Пiлнiчной Америкы. В рамках выстави орґанiзуваны были сериi лекций, варштатiв i дискусий. То барз важна выстава, яка влинула на тото, што русиньска штука i Русины стали іщы барже видны в соспiльным, i не лем, дискурсi. Сердечнi ґратулюєме вшыткым, котры працювали над сесом выставом, а предовшыткым кураторови – др. Михалови Шымко, якiй од початку до кiнця на вельох фронтах мiцно борол ся, жебы «Формы присутности» были зреализуваны.

Свято Бурсы i Радия

В суботу 4. липця/юлия в Рускiй Бурсi в Ґорлицях пройде святкуваня 35-лiтя реактивациi Стоваришыня «Руска Бурса», а тiж 15-лiтя Радия ЛЕМ.ФМ. Перше о год. 11:30 в каплици на Святій Горі Явір буде богослужыня в памят бл.п. Богдана Ґамбаля. Пак, о 17 год. плянувана є прелекция проф. Анны Мусь зо Шлезского Унiверситету пн. «Ruch etnoregionalistyczny na Górnym Śląsku. Proces narodowotwórczy czy sprzeciw wobec nacjonalizującego państwa?». По прелекциi – одомаш. Запрашаме вшыткых охочых взяти участ в святкуваню.

«Гафтуване по свойому» – выстава ґрафік

Од 11. липця/юлия до 31. cерпня/авґуста в грекокатолицкiй церкви свв. Космы i Даміяна в Бортным i Мазярскiй Загородi в Лоси буде мож обзерати выставу Лавры Дичко пн. «Гафтуване по свойому». Вернісаж одбуде ся в суботу, 11. липця/юлия о 15.00 год. в церкви в Бортным. Выстава представлят ґрафіку і тифлоґрафіку – працы приготовлены так, жебы могли быти приниманы не лем зором, але тіж дотыком. Артистка бере інспірациі з традицийного лемківского орнаменту і вышыванкы, творячы сучасны інтерпретациі народной штукы. Експозициi презентуваны будут в Бортным i в Лоси – двох мiсцях сильно звязаных з лемквiском культуром. В каждым з них вказаны будут iнчы працы артисткы, разом творят они єдно оповiданя о гафтi, памяти i традициi.