Сумар дня на 10. липця/юлия 2026 р.

Приносиме вам сумар медияльной ґрупы ЛЕМ.фм+ на ден 10. липця/юлия 2026 р.

15. Русиньска Ватра в Малым Липнику

Уж днес загорит 15. Русиньска Ватра в Малым Липнику, яку рыхтує орґанізация молоды.Русины. Проґрам зачне ся о 18.00 год. выступами дітячых фольклорных ансамблів. Пак буде перегляд лавреатів і участників послініх річників конкурсу Співы мого роду, і проґрам з назвом Вечер русиньскых голосів. Ден завершыт ся вечерньом забавом. Суботній ден ватры зачне ся о год. 16.30 «Мозаіком Реґіону» – проґрамом фольклорных колектівів з реґіону і близкой околиці. Дальшы ансамблі запрезентуют ся пак в проґрамах «Витайте, сусіды» і «В кругу жывота». В рамках товаришучого проґраму буде мож скоштувати традицийны стравы з реґіону, взяти участ м.ін. в варштатах народной вышывкы ци сітодруку. Буде тіж школа танця, выстава фотоґрафій і активности про діти. В неділю рано в храмі свв. Космы і Даміяна правлена буде св. Літургія, а пак пройде концерт духовной пісні. Орґанізаторы зрыхтували тіж специяльну мобільну аплікацию м.ін. з комплетным проґрамом фестівалю в русиньскым, словацкым і польскым языках, мапом обшыри і важныма оголошынями. Дрібниці находят ся на фейсбуковым сайті Русиньска Ватра.

Якуб Пшыбыцєнь остал лавреатом VIII Конкурсу Малера в Бамберґу

Радо інформуєме, што Якуб Пшыбыцєнь остал лавреатом VIII Конкурсу Малера в Бамберґу, єдного з найбарже престіжных на світі конкурсів для молодых дириґентів. Лемко отримал другу нагороду – першой нияк не признано. Третє місце ex aequo заняли репрезентанты Італиі і Франциі. Першый раз в істориі того Конкурсу репрезентант Польщы зашол так высоко. Ґратулюєме!

Православны торжества на Святій Горі Явір

Рушыло піше православне поломництво на Святу Гору Явір, де в найблизшу неділю православны Лемкы будут празднувати ден святых апостолів Петра і Павла. В тым році одзначена буде тіж 100. річниця повороту Лемків до православія. 36. піше поломництво тым разом веде путьом Повороту Лемків до Православія. Зачало ся оно днес рано св. Літургійом в Тыляві. Дальше траса поломництва веде зо Святковы Великой, через Свіржову Руску, Бортне, Баницю, Вірхню до Ґладышова. Другого дня поломникы підут через Смерековец, Квятон і Шквіртне до Ганчовы, де о 17.00 год. будут ся правити вечырні богослужыня. В ден святя, в неділю 12. липця/юлия поломникы перейдут до Высовы – при церкви св. Архістратига Михала привитаны будут єрархы. Пак вшыткы вірны выйдут вєдно на Святу Гору Явір, де о 10.00 год. буде правлена Свята Літургія.

Грекокатолицкы торжества на Святій Горі Явір

В найблизшу неділю рушыт і грекокатолицкє піше поломництво на Святу Гору Явір, якє одбуде ся в днях од 12. до 14. липця/юлия. Вело буде од Лютины на Словациі, через Мальців, Ґабольтів, Нижній і Выжній Тварожец і Цигельку. Богослужыня залянуване єст на початку поломництва, в Лютині, і пак на Святій Горі Явір. Архієрейска літургія з процесийом буде попереджена молебном до Пресвятой Богородиці.

Успіх анімуваныого фільму «Еха» на лемківску тему 

Анімуваный фільм «Еха» был вєдно з 30 інчыма фільмами выбраный до польского конкурсу Медженародного Фестівалю Анімуваных Фільмів Аніматор о званя найліпшой польской анімациі. Творчыньом анімациі єст Йоанна Фучко, а звуку Анджей Юзефчык. «Еха» то короткє оповіданя о втраті і памяти, інспіруване примусовым выселіньом Лемків з Карпат в рамках акциі «Вісла» в 1947 р. Анімация, котра лучыт ріжны технікы, єст рефлексийом над втраченым домом і достоменністю. Основом звуковой верствы сут тереновы і архівальны награня з выселеных сел в Низкым Бескіді.

«Сучасна Карпатска Народна Різба в Камени – 2026» – підсумуваня і выстава

Музей Сандецкой Землі просит до участи в торжественным підсумуваню V едициі Конкурсу «Сучасна Карпатска Народна Різба в Камени – 2026» і на вернісаж поконкурсовой выставы. Подія пройде уж заран в Ґалицийскым Місточку в Новым Санчы о 11.00 год. Поконкурсовы выставы будут вказаны в Сандецкым Етноґрафічным Парку, Реґіональным Осередку Культуры в Бєльско-Бялій і Містным Музею в Жывци.

Джерело фотоґрафіі: Йоанна Фучко / Joanna Fuczko