Сумар дня на 14. липця/юлия 2026 р.

Приносиме вам сумар медияльной ґрупы ЛЕМ.фм+ на ден 14. липця/юлия 2026 р.

Присяжны тлумачы кашебского языка

Кiнцьом червця/юнiя в Польщы на Помори прошла свого рода iсторична подiя. Кашебскiй язык дождал ся першых присяжных тлумачів. Дариюш Майковскій і Матеуш Клебба успішнi здали державный еґзамін і ждут тепер лем на присягу, котра завершыт процедуру наданя прав. Подія є важным кроком в розвитку кашебского языка. Присяжны тлумачы будут мочы приготовляти офіцийны переклады на потребы судів і адміністрациі, забезпечаючы особам, котры бесiдуют по кашебскы, рівный доступ до державных урядiв.

Карпатскiй реґіон: етнолінґвістика і культурны студиі

9. липця/юлия cкiнчыла ся рекрутация на напрям студий Карпатскiй реґіон: етнолінґвістика і культурны студиі на Ягайлоньскым Університетi в Кракові. Для тых, котры можут быти заiнтересуваны другом туром рекрутациi, яку ЯУ повинен скоро оглосити, припоминаме пару iнформаций. Напрям скєруваный є для осіб, якы сут заiнтересуваны языками, історийом, літературом, музиком і культуром держав карпатского реґіону. Студиі дают можливіст познати культурну ріжноріднiст Карпат, історичны процесы, што формуют тот простір, а так само спільны і окремы традициі в Польщы, Украiнi, Словациi, Румуніi, Чехах i на Мадярах. В рамках проґраму студий мож ся вчыти словацкого і украiньского языків, а тiж записати ся на факультативный лекторат лемківского языка – єдиный такiй курс на унiверситетскым рiвни в Польщы. Занятя ведут науковці з ріжных катедр і інститутів, м.ін. філолоґічных, етнолоґiчных і реліґійознавчых, што дає тым студиям iнтердисциплінарный характер. В рамках напряму ведены сут тiж тереновы досліджыня в карпатскых реґіонах Польщы і за єй границьами. Iнформациi на тему Карпатского реґіону мож найти на сторонi Iнституту Схiдньославяньской Фiлолоґii Ягайлоньского Університету.

Грекокатолицкє поломництво на Святу Гору Явір

Днеска є третiй ден грекокатолицкого поломництва на Святу Гору Явір, якє зачало ся в недiлю 12. липця/юлия i буде тырвало до 17. липця/юлия. Днес тiж, подля пляну, по богослужыню о 7:00 год., поломникы рушыли в дорогу од Лютины на Словациі. В пятницю через Цигельку мат войти на Святу Гору Явiр, де заплянуване є богослужыня. Архієрейска літургія з процесийом буде попереджена молебном до Пресвятой Богородиці.

Працовня Ікон «Мандиліон» – вернісаж выставы

В четвер, 16. липця/юлия, о 17.00 год. в Ґалериі Bielanka73 в Білянці одбуде ся вернісаж выставы Працовні Ікон «Мандиліон». На выставі будут презентуваны іконы авторства Лідиi Трохановской-Пеляк, Анны Трохановской і Мирослава Трохановского. Працовня «Мандиліон» діє од понад 25 років і творит іконы, навязуючы до традициі карпатского іконопису. Выставу мож буде обзерати до 14. серпня/авґуста тр.

57. Фестiваль Русиньской Культуры «Еха Волчых Гір»

В днях 17.-18. липця/юлия в Уличу на Словациі буде проходил 57. Фестiваль Русиньской Культуры «Еха Волчых Гір». В рамках подii плянуваны сут концерты, ярмак, варштаты, танцювальны забавы і проєкция фiльму «Потопа». Веце iнформаций найдете на социяльных медиях Фестiвалю i на нашым сайтi.

33. Свято Дiти Гiр

19. липця/юлия, в недiлю, в Новым Санчы зачынат ся 33. Свято Дiти Гiр – медженародный фольклорный фестіваль, в котрым берут участ дітячы ансамблі з ріжных гiрскых реґіонів світа. В подіi бере участ около 400 діти в віку од 7. до 14. років. Ансамблі презентуют традицийну музику, танец і культуру своiх держав. Проґрам обнимат спільны концерты, короводы і выступы на сценах під одкрытым небом. В попередніх едициях подіі участ брали ґрупы з ріжных континентів – Европы, Азиі, Африкы та обох Америк, котры репрезентували многы державы. Подiя буде тырвала до 25. липця/юлия.

Фот.: Kinga Ptak