Сканзен в Бардейовскых Купелях по обнові привітав навщівників

Музей народной архітектуры в Бардейовскых Купелях закінчів велику реконштрукцію історічных обєктів за майже 1,9 міліона евр. Як інформовала Даша Єленьова, говоркыня Пряшівского самосправного краю (ПСК), котрый є зряджовательом того найстаршого на Словакії сканзену, реконштрукція была реалізована в рамках черезгранічной співпраці.

Реконштрукція принесла ревіталізацію двадцятьох обєктів, включно деревяных храмів, дзовніць ці хыж на бываня. Обновленый ареал одкрыв Шарішскый музей в Бардейові про людей почас традічного Ремеселного дня в неділю 26-го юла 2026-го року.

Місце, де історія заховала ся в найавтентічнішій подобі

Сканзен перешов великов обновов в рамках черегранічного проєкту Interreg Польща – Словакія 2021 – 2027. Проєкт під назвов Музей – мій часопростор, реалізовала жупна інштітуція вєдно із партнерьскым Музейом ремесел в польскім Кросні із цілковым розрахунком 3,9 міліона евр.

На словацькім боці представлює інвестіція майже 2 міліомны евр, в рамках чого найвызначнішу часть представльовали фінанції із Европского фонду реґіоналного розвитку. Фінанцованя было так само із державного розрахунку а розрахунку ПСК.

„Сканзен в Бардейовскых Купелях є місцьом, де історія нашого краю заховала ся в тій найавтентічнішій подобі. Обнова того выняткового ареалу – то інвестіція до културной дідовизны, котру хочеме хранити і передати далшым ґенераціям,“ повів председа ПСК Мілан Маєрьскый.

Пряшівского жупана тішыть, же музей має теперь ліпшы обставины про актівности музея, ліпшы условія про навщівників домашніх і загранічных, што подля нього поможе ку векшій атрактівности регіону і цілого краю.

Обновило ся двадцять обєктів

Проєкт быв заміряный на ставебно-технічну обнову обєктів сканзену, в рамках того вымінили ся шындльовы стріхы, реконштруовали ся кроквы, робили і далшы роботы, котры помогли ку охрані цінных історічных обєктів.

Ревіталізаційов перешло довєдна 20 обєктів. Обновлены были і два деревяны храмы, сім хыж на бываня, дві господарьскы будовы – сыпанці, дзвоніці, ковальска шмыкня, сушарня овоцины, і далшы обєкты.

Реконштрукційов перешов і гоблярьскый варсштат, в котрім выникнув новый выставно-едукачно-презентачный простор, де мож орґанізовати події, освітні актівности і то цілый рік.

Найстаршый на Словакії

Сканзен в Бардейовскых Купелях належыть меджі найвызначнішы музеї в природі на Словакії, і є найстаршый. Выникнув у 1965-ім році і сохранять унікатны приклады народного будованя словацького і русиньского населіня северовыходу Словакії.

На приблизно 1,6-гектаровій теріторії є коло тридцять обєктів переважно із 19-го і 20-го столітя, котры презентують будованя словацького і русиньского населіня в реґіоні Шаріша і северного Земпліна. Домінантов є деревяный Храм святого Николая із 1766-го року, котрый до сканзену перенесли із русиньского села Збой.

Фото: ПСК.