Сумар дня на 28. липця/юлия 2026 р.

Приносиме вам сумар медияльной ґрупы ЛЕМ.фм+ на ден 28. липця/юлия 2026 р.

10. річниця смерти архієпископа Адама Дубеца

24. липця/юлия минула 10. річниця смерти архієпископа Адама Дубеца, першого православного єпископа обновленой по близко 300-літній перерві, історичной перемышльской єпархіі. Родом был з Фльоринкы, де вродил ся в 1926 р. i з котрой был выгнаный в 1947 р. Владыка Адам причынил ся до розвитку православного жытя на Лемковині. За його служыня на Лемковині повело ся не лем поставити єпархіяльны структуры, але самособом владыка Адам причынил ся до чысленных ремонтів памятковых лемківскых церкви і будовы новых м.ін. в Ґорлицях, Креници, Ряшові, Реґєтові, Білянці. При тым же повело ся привернути культ Пресвятой Богородиці на Святій Горі Явір. Архієпископ покликал тіж Мужскій Православный Монастыр Покровы Пресвятой Богородиці в Высові, започаткувал печатаня выдавництв в реактивуваній єпархіі, а тiж был ініциятором канонізациі о. Максима Сандовича. Доднес є памятаный як духовный провідник і оборонця православной традициi, якiй нележыт до найважнійшых духовных осіб Православной Церкви на Лемковині.

46. Лемківска Ватра на Чужыні

Припоминаме, што в днях 31. липця/юлия – 2. серпня/авґуста в Михалові одбуде ся 46. Лемківска Ватра на Чужыні, орґанізувана Стоваришыньом Лемків. Як што рока, на участників ждут концерты, стрічы, богатый культурный проґрам і додатковы атракциі. Головный проґрам зачне ся в пятницю о 18.00 год. По офіцийным одкрытю і розпаліню ватры на сцені выступят м.ін. Хор Зоря, Гудаци, Ре-Карпаты, Вербунк, Бурян, а вечер завершыт Джем Сешын. В суботу по вечырни в церкви св. Михаіла Архангела выступлят дітячы ансамблі, а дальше Ластівочка, Кычера, Капеля Само Полудне, Грайте! і Водограй, котрый буде святкувати своє 50-літя, і Лемкус. Окрем концертів орґанізаторы прирыхтували шатро бесід, в якым пройдут стрічы з авторами книжок, дослідниками і діячами лемківской культуры. Будут тіж варштаты, лісовы купелі, танцювальны занятя, зона для діти, спортовы змаганя та інчы атракциі для цілых родин. Полный проґрам і інформациі о білетах доступны сут на профілях Лемківской Ватры на Чужыні в социяльных медиях.

Конкурс «Daj się zauważyć na Zabytek.pl»

Нацийональный Інститут Спадковины оголосил конкурс «Daj się zauważyć na Zabytek.pl», котрый заохочат до фотоґрафуваня і промуваня найціннійшых памяток культурового дідицтва в Польщы. Зголошыня мож высылати до 31. серпня/авґуста. До участи можут зголосити ся дорослы, а тіж молодіж од 13. рока жытя за згодом родича або опікуна. Старчыт лем зробити авторску фотоґрафію памяткы, помістити єй під конкурсовым дописом на профіли Нацийонального Інституту Спадковины та подати назву обєкту, місце і дату, коли знимка была зроблена. На лавреатів чекают нагороды. Заохочаме Лемкiв, i вшыткых, для котрых Лемковина є важным мicцьом, до участи в конкурсі. То iдеальна нагода, жебы показати красу Лемковины – деревяны церкви, капличкы, стары хыжы, цмонтері, придорожны кресты або іншы памяткы нашого культурового дідицтва. Найліпшы знмикы можут не лем отримати нагороду, але тіж помочы промувати выняткову лемківску спадковину в цілій Польщы.