Руска Бурса і ЛЕМ.фм одзначены вчас 46. Лемківской Ватры на Чужыні

Точно 1. червця/юнія текучого рока минуло 35 років од реактивациі Стоваришыня «Руска Бурса» в Ґорлицях та 15 років од моменту, коли в ефір пішол сиґнал першого лемківского радия ЛЕМ.фм.

З той нагоды вчас першого дня 46. Лемківской Ватры на Чужыні, коли проходила офіцияльна част подіі, Стоваришыня Лемків одзначыло бурсаків і членів медияльной ґрупы ЛЕМ.фм+.

Братні орґанізациі, якы лучыт єдна ідея

По переданю Нагороды ім. Никыфора, яка того рока трафила до рук Стефаніі Трохановской, на михалівску сцену на заклик конферансиєркы Анны Ревак, вышли члены Стоваришыня Лемків, просячы членів Стоваришыня Руска Бурса в Ґорлицях і заєдно редакторів лемківскых медий. Найперше желаня склал Ведучый ГЗ СЛ Андрий Koпча, пак голос мал Секретар ГЗ СЛ Севериян Косовскій, якій спомнул, што выступує в потрійній роли, не лем як фукнцийный Стоваришыня Лемків, але самособом член ґорлицкой Руской Бурсы і редактор радия ЛЕМ.фм.

В даным слові припомнул, што реактивация найстаршой лемківской орґанізациі была можлива медже інчыма завдякы товдышньому заанґажуваню членів Стоваришыня Лемків – братньой орґанізациі, основаной кус перше – в 1989 р. Наконец припомнул бл. п. Богдана Ґамбаля (1965-2020) – того, завдякы котрому повело ся довести до реактивациі Стоваришыня Руска Бурса в Ґорлицях на основі первістного статуту.

На сцені была присутна і проф. Олена Дуць-Файфер, Заступця Ведучого ГЗ СЛ, але в тым припаді єдна з участничок історичного зобраня з 1. червця/юнія 1991 р., якє дало початок оновленій Рускій Бурсі в Ґорлицях.

Почестну Грамоту од Стоваришыня Лемків одобрала Ведуча Заряду Стоваришыня Руска Бурса в Ґорлицях Наталия Малецка-Новак. Присутны на сцені были тіж члены общества і редакторы радия – Павел Малецкій та Петро Медвідь. Перед сценом присутный был Даміан Трохановскій, якій знимал подію.

Наталия Малецка-Новак подякувала за памят. Зазначыла, што обі лемківскы орґанізациі все ідут в єдным ідеовым напрямі. Основны цінности сут спільны, а дозвалят тото робити необхідны справы для Лемків в Польщы.

Чест Богданови Ґамбальови

На другій ден бурсакы і редакторы подали ся до оддаленого од Михалова о пару кілометрів Любіна, де на тамтышнім цмонтери спочыват бл. п. Богдан Ґамабаль.

Ведуча Руской Бурсы занесла свому попередникови вінец квітя та памятну таблицю, яку ден перше бурсакы отримали од Стоваришыня Лемків.

Богдан Ґамбаль был як раз тым, хто реактивувал Стоваришыня Руска Бурса в Ґорлицях (повело ся му навязати контакт з довоєнным бурсаком і учытельом Петром Феціцом з Кракова, в якого руках находил ся первістный статут орґанізациі).

За його справом ґорлицка бурса одродила ся не лем на папери в 1991 р., але остаточно в 2009 р. были ій вернути маітельскы права до історичной будівлі при ул. Сєнкєвича 28.

Руска Бурса і перше лемківскє радийо

1. червця/юнія 1991 рока зышло ся парунадцет свідомых осіб, што рішыли реактивувати довоєнне Стоваришыня Руска Бурса. Были то: Богдан Ґамбаль, Мирослава Хомяк, Ольга Каня, Анна Ґамбаль, Антоніна Коцур, Меланія Клинковска, Олена Дуць-Файфер, Павел Стафиняк, Миколай Падухович, Ігор Горощак, Михал Коцур, Анна Переґрим, Ірена Квока, Ян Квока, Юлия Прокопчак і Мариюш Габура.

Бурсаками, што основали общество в 1908 р. (хоц сут уж сліды того, што першы діяня могли быти такой рік скорше), были м.ін. о. Василий Курилло, о. Михаіл Юрчакєвич, о. М. Дуркот, о. Григорий Максимович, о. Владимір Калужняцкій, Даміан Бубняк, Григорий Ґаль.

Дотля Богдан Ґамбаль был тым, што найдолше вюл общество, при тым в напрямі його успішнього розвитку, чого доказом был початок першого лемківского радия ЛЕМ.фм, якє зачало своє высыланя 1. червця/юнія 2011 р. – уж «на своім» – в просторах одзысканой ґорлицкой бурсы.

В моменті признаня грамоты од Стоваришыня Лемків, теперішня ведуча Руской Бурсы спомнула вшыткых своіх попередників по 1991 р. (за порядком были то: Ольга Каня, Павел Стафиняк, Богдан Ґамбаль, Йоан Квока, зас Богдан Ґамбаль, Павел Малецкій, Даміан Трохановскій, Богдан Ґамбаль (третій раз) – до 2020 р.), але тіж вшыткых тых, што долгыма роками стояли при бурсі, трудили ся при ній, для котрых была она основом штоденной діяльности.