Высокопреосвященый Йона коруновав чудотворну ікону із Шашовой

В днях 15-го і 16-го авґуста 2026 в Шашовій, Бардейовского окресу, одбыв ся традічный архієпархіалный одпуст на праздник Успенія Пресвятой Богородіці. Суботняйшый проґрам почав привітаньом путників, котры ішли до Шашовой піше із Бардеова. На тій пути брав участь і Высокопреосвященый владыка Йона Максим, пряшівскый архієпіскоп митрополіта.

Головным пунктом одпусту была недільна торжественна архієрейска Божественна літурґія, котрой головным служытельом быв кір Йона.

Перед літурґійов одбыв ся обряд нового корунованя чудотворной іконы Пресвятой Богородіці із Шашовой при нагоді 320-ой річніці їй слызыня обновленыма корунками. Подля доступных історічных записів тота ікона у 1706-ім році слызыла кырваны слзы із букв ІС ХС почас семох тыжднів.

Шашова, котра є філійов парохії Ортутова, із свойов Іконов Пресвятой Богородіці з Дітинов на руках, яка є із 15-го столітя, і котра ся подля канонічной візітації із 1834-го року споминать як miraculosa (чудотворна), є найстаршым путницькім місцьом Пряшівской архієпархії.

Точнішы даны о чудах повязаных із тов іконов ся не сохранили, але о тім, же ся ту діяли чуда, свідчіть цінный документ, писмо Папы Римского Пія VI. iз 30-го юна 1779-го року, в котрім ся пише о уділіню повноміцных одпустків про храм в Шашовій на 7 років. Документ быв подля канонічной візітації із 1834-го року уложеный в храмі, в кивоті.

Кедьже повноміцны одпусткы были про храм в Шашовій уділены уж в 1779-ім році, мож конштатовати, же путованя віруючіх ку тій іконі почало омного скоріше в минулости. Од 1845-го року в Шашовій одбывають ся каждый рік одпусти при нагоді праздника Успенія Пресвятой Богородіці.