«Голосы Русинів Підкарпатя» – середа, 18.10 год.

На єднім з юбілеїв народного маляря Україны Василя Свалявчика познакомив єм ся з цімбором Василя Петровіча із Міжгірщіны – Васильом Михайловічом Сеньком. До того в інтерниті вже-м стрічав роботы того маляря і добре-м знав його брата, Івана Михайловіча Сенька – знамного ученого-фолклорісту. Зато дяка зробити інтервю з паном Васильом не лишала ня почас тых послідніх років.

Василь Михайловіч – се дітина Верьховины, дітина нашого Марамороша. Позераючі на його полотна зачінаш розуміти, што лем тота земля родить такы таленты, такы самородкы як наш герой.

Василь Сенько, математік за професійов і педаґоґ,  ани єдного дня не ходив у малярьску школу, але його пейзажы, образы з зображеньом сакралной архітектуры Карпат, нашых сел, хыжок чудують любителів жывописа. І на днесь такых коло 700 лем дома у того умелця.

Слухайте «Голосы Русинів Підкарпатя» в середу 26-го авґуста 2026 р. о 18.10 год., або повторіня в четверь 27-го авґуста о 4.30 год. і в суботу 29-го авґуста о 11.00 год. за русиньскым часом.