Сумар дня на 25. серпня/авґуста 2026 р.

Приносиме вам сумар медияльной ґрупы ЛЕМ.фм+ на ден 25. серпня/авґуста 2026 р.

З Климківком єст штораз гірше

Климківскє озеро в Низкым Бескіді од близко двох років боре ся зо штораз низшым рівньом воды. О проблемі уж сме писали, коли в звязку з высокыма температурами і малым вплывом воды гідна част засобника, особливо в його выжній части в околицях Устя Руского, зачала высыхати. Тепер ситуация є іщы тяжша. До озера вплыват уж лем 0,11 м³ воды на секунду, а з засобника выходит коло 1 м³ на секунду. То значыт, же з Климківкы выплыват тепер веце воды, як до ней вплыват. В результаті засобник дальше тратит своі засобы. Подля найновшых даных в Климківці находит ся коло 6,04 млн м³ воды, а єй резерва выносит 35,91 млн м³. Кількіст воды выпущаной з резервуару уж є зменшена – давнійше было то середньо коло 2 м³ на секунду, тепер коло 1 м³. Не дає то шансы одбудувати водных засобів Климківкы. Низкій рівен воды видный є тіж на ріці Ропі. 20. серпня/авґуста в Устю єй рівен мал 153 цм, значыт находил ся в зоні низкых станів, бо абсолютне мінімум то 130 см. Значыня Климківкы єднак выходит далеко поза рекреацийну функцию. Долготырвале утримуваня ся низкого рівня воды може мати консеквенциі не лем для середовиска і туристикы, але предовшыткым для господаруваня водныма засобами і засобами локальной господаркы. Найновшы даны вказуют, же проблем дальше ся поглублят.

«Гафтуваня по свойому» – послiднiй тыжден выставы

То уж послiднiй тыжден, жебы обiзрити выставу «Гафтуваня по свойому. Ґрафіка і тифлоґрафіка» Лавры Дичко. Експозиция, презентувана од липця/юлия в двох місцях повязаных з лемківском культуром – в грекокатолицкій церкви в Бортным та в Мазярскій Загороді в Лоси – буде доступна для одвиджаючых лем до 31. серпня/авґуста. Выстава лучыт ґрафіку, рисунок і досвідчыня дотыку. Працы Лавры Дичко створены были з інспірациі лемківскым гафтом, його взорами, знаками крестикового гафту. Артистка одкликує ся при тым не лем до самой традициі выробів ручной роботы, але тіж до памяти і спадковины лемківской культуры. Окремым елементом експозициі є єй доступ для невидячых і слабовидячых осіб. Выбраны творы зроблены сут в техніці тифлоґрафікы, завдякы котрій мож іх «обзерати» тіж через дотык. В обох місцях презентуваны сут ріжны працы артисткы, што творят спільну оповіст о гафті, памяти і традициі.

Стріча «Łemkowie – opowieść w skrawkach»

В пятницю 4. вересня/септембра о год. 17.00 в Пшемківскым Осередку Культуры і Бібліотеці одбуде ся наступна стріча з циклю «Łemkowie – opowieść w skrawkach», посвяченого істориі, культурі і языкови Лемків. Подія є подiлена на пару блоків. Першый з них буде посвяченый Лемкам вчера і днеска, то єст буде о тым, кым сут Лемкы – в рiжных контекстах. Пак участникы будут мочы взяти участ в лекциі лемківского языка, підчас котрой познают м.ін. основны слова, звороты а так само азбуку. Стрічу закінчыт част посвячена лемківскій музиці, співови і танцьови, яка даст участникам шансу не лем послухати, але тіж активні влучыти ся в познаваня традициі. Стрічу поведут Оксана Грабан-Ліхтаньска і Данько Горощак. На подію прошены сут тоты, котры уж знают лемкiвску культуру, а так само тоты, котры хотят ю познати. Вступ дармо.

Карпатскiй реґіон – рекрутация

До 13. вересня/септембра тырват рекрутация на напрям студий Карпатскiй реґіон: етнолінґвістика і культурны студиі на Ягайлоньскым Університетi в Кракові. Скєруваный він є для осіб, якы сут заiнтересуваны языками, історийом, літературом, музиком і культуром держав карпатского реґіону. В рамках проґраму студий мож ся вчыти словацкого і украіньского языків, а тіж записати ся на факультативный курс румуньского языка або єдиный того рода курс на університетскым рівни в Польщы – лекторат лемківского языка. Лишаме мотузок до статi о напрямі: Карпатскiй реґіон.