Ужгородьскый сканзен одпрезентує „мултікултурну дідовизну“ без Русинів

Як на своїй офіціалній сторінці на соціалній сіті Facebook інформовав Закарпатьскый музей народной архітектуры і бываня, в неділю 30-го авґуста 2026-го року у своїх просторах орґанізує науково-практічну конференцію під назвов Етнічна палета Закарпатя: історія, културна дідовизна і музейна репрезентація.

Ужгородьскый сканзен подля публікованых матеріалів дав простор про презентацію дакілько народностных комуніт, котры жыють на Підкарпатю, но Русины на тій конференції простор не дістали.

„Конференція стане простором про діалоґ меджі представителями народностных комуніт, музейниками, дослідниками і жытелями. Будеме говорити о історічній памяти і културній ідентіті, традіціях і сучасности, а так само о тім, як мултікултурна дідовизна Закарпатя є представлена і сохраняє ся в музейнім просторі,“ пише орґанізатор.

Участны конференції будуть годны выслухати дакілько лекцій, в рамках котрых буде бісідовати ся наприклад о Мадярах, Словаках, Жыдах, Румунах і різных аспектах їх култур в рамках Підкарпатя, но ани єдна тема не є присвячена Русинам і їх културі, хоць Русины суть автохтонным населіньом, яке історічно творило майорітне населіня днешньой Закарпатьской области Україны.

Хоць од 2007-го року на основі рішіня Закарпатьской областной рады Русины суть на теріторії Закарпатьской области Україны вызнаны як окрема народность, тото не першый раз, коли на такых і подобных форумах Русины суть іґнорованы. Мултікултурность Підкарпатя є презентована без корінного народа того краю, хоць артефакты в музею суть де великой міры якраз русиньскы.

Припомяньме, же у 2023-ім році Закарпатьска областна воєньска адміністрація інформовала, же Закарпатьска область стала першым реґіоном Україны, де штартовали конзултації із представителями народностных комуніт. На тоту стрічу так само Русины запрошены не были.

Кедь сьме ся звернули до адміністрації із вопросами, чого Русины, котры на теріторії области суть окремов народностьов, запрошены не были, нихто на вопросы не реаґовав.

Жрідло фотоґрафії: Wikipedia/Elke Wetzig.