Сумар дня на 28. серпня/авґуста 2026 р.

Приносиме вам сумар медияльной ґрупы ЛЕМ.фм+ на ден 28. серпня/авґуста 2026 р.

В Креници побудуют професийональный санечковый тор і стартову вежу

Кренциця фурт інвестує в санечкарство. В тым місяци ґміна отримала середовискове рішыня в справі будовы професийонального, мороженого санечкового тору на горі Івонка. Тор буде чыслил близко 2 км і буде єдным з невельох того типу обєктів в Середньо-Східній Европі. Буде він посадженый на стовпах, котрых буде парусот. Жебы оцінити, як глубоко треба навертіти стовпы, потрібны сут баданя ґрунту. По тым буде ґеолоґічне рішыня і конкурс оферт. Подля бургомайстра Пьотра Рыбы, документацийна процедура може тырвати до 2029 р., коли могла бы ся зачати будова тору. Кошт інвестициі єст чысленый на 100 млн злотых. Ґміна Крениця буде ся старала о центральне фінансуваня будовы тору, на котрым в будучности мают ся одбывати змаганя медженародной ранґы. Окрем того Крениця єст штораз ближе будовы стартовой вежы для санечкарів. Ґміна буде ся старала о урядове фінансуваня інвестициі. Вежа мала бы станути близко машыновні ледовой галі, што даст можливіст морожыня полученого з ньом плянуваного ледового тору. Подля бургомайстра самоуряд єст на етапі здобываня позволіня на будову, котре може позыскати на яр 2027 р. Вежа могла бы быти готова уж рік пізнійше. На 60-метровій вежы будут тренувати професийональны спортовці.

ІІІ Дукляньскій Ґалицийскій Рыночок

В найблизшу недію на рынку в Дукли одбуде ся ІІІ Дукляньскій Ґалицийскій Рыночок. Подія зачне ся о 12.00 год. і потырват праві до пілночы. В єй рамках одбудут ся концерты і забава, а окрем того буде мож м.ін. скоштувати реґіональны стравы трансграничной кухні, зрыхтуваны локальныма аґротуристичныма ґаздівками і кружками сельскых ґаздынь. Буде ярмак старых предметів, як і презентациі прац локальных артистів і ремісників. Заплянуваны сут тіж атракциі для діти, в тым сферичне кіно, зрыхтуване Осередком Культуры в Дукли. Орґанізатором подіі єст Стоваришыня Дукляньскій Ґалицийскій Рыночок, а партнером Підкарпатскє Воєвідство. Вступне на подію дармо.

Остатні дни выставы «Гафтуваня по свойому. Ґрафіка і тифлоґрафіка» Лавры Дичко 

Лем до найблизшого понеділька мож іщы обiзрити выставу «Гафтуваня по свойому. Ґрафіка і тифлоґрафіка» Лавры Дичко. Експозиция презентувана єст од липця/юлия в грекокатолицкій церкви в Бортным та в Мазярскій Загороді в Лоси. Выстава лучыт ґрафіку, рисунок і досвідчыня дотыку. Працы Лавры Дичко створены были з інспірациі лемківскым гафтом, його взорами, знаками крестикового гафту. Артистка одкликує ся при тым не лем до самой традициі выробів ручной роботы, але тіж до памяти і спадковины лемківской культуры. Окремым елементом експозициі є єй доступ для невидячых і слабовидячых осіб. Выбраны творы зроблены сут в техніці тифлоґрафікы, завдякы котрій мож іх «обзерати» тіж через дотык. В обох місцях презентуваны сут ріжны працы артисткы, што творят спільну оповіст о гафті, памяти і традициі.

Джерело фотоґрафіі: Polski Związek Sportów Saneczkowych