Сумар дня на 27. серпня/авґуста 2026 р.

Приносиме вам сумар медияльной ґрупы ЛЕМ.фм+ на ден 27. серпня/авґуста 2026 р.

Тырват фестіваль «Музика Заклята в Деревi»

Вчера зачал ся фестіваль «Музика Заклята в Деревi». Потырват до 30. серпня/авґуста в забытковых деревяных обєктах Низкого і Сандецкого Бескідів. Концерты проходят м.ін. в церквах в Квятони і Верхомли Великій, в Мазярскій Загороді в Лоси, при костелі в Санковій та в амфітеатрі в Высовій. В проґрамі подіі нашли ся артисты, якы репрезентуют ріжны музичны жанры – од музикы інспіруваной традицийом Карпат і фольклором по сучасну альтернативну музику і поп. Фестіваль отворила Вернигора, а в дальшых днях выступлят м.ін. Войтек Шуманьскiй, Туля і VOŁOSI. Подіі товаришат тіж варштаты ремесла, презентациі реґіональных страв, деґустациі локальных продуктів і зiля. Кажда з подій має быти нагодом, жебы познати выняткове дідитцтво Шляку Деревяной Архітектуры в Малопольщы. Вшыткы концерты сут безплатны.

Во Вроцлавю мож видіти творы Епіфана Дровняка

В Архієпархіяльным Музею во Вроцлаві тырват выстава пн. «Никыфор – феномен саморідного таланту». Експозиция презентує 50 робіт Епіфана Дровняка – Никыфора, а тіж 20 фотоґрафій, котры вказуют творцю в ріжных періодах його жытя. Выстава є поділена на три части і розміщена в трьох музейных салях. Перша част, «Такым я был», презентує документальны фотоґрафіі Никыфора та його лист, в котрым просил люди купувати його образы. Друга част, «Такым єм хотіл быти», показує автопортреты, на котрых Никыфор представлял себе як важну і шанувану особу – урядника або єпископа. Третя, «Такым был мій світ», вказує світ, котрый артиста виділ своіма очами: церкви, місцевости, архітектуру, краєвид і сцены штоденного жытя. Выставу мож видіти до 15. листопада/новембра тр.

Уж о нецілый місяц Лемківска Творча Осін

В днях од 19.-20. вересня/септембра проодила буде ХХХIV Лемківска Творча Осін. Подія того рока пройде в Бортным (першый ден), і наступного дня в Рускій Бурсі в Ґорлицях. Тогорічна едиция посвячена буде памяти Федора Кузяка (1926-2010), в 100. річницю його народжыня. Прото тіж першый ден одбуде ся в Бортным – рідным селі маляря, байкаря і соспільного діяча. Детальный проґрам буде оприлюдненый неодолга – товды го Вам принесеме. Орґанізатором подіі є Стоваришыня Лемків.

В Пшемкові одбуде ся стріча «Łemkowie – opowieść w skrawkach»

В пятницю 4. вересня/септембра о 17.00 год. в Пшемківскым Осередку Культуры і Бібліотеці одбуде ся наступна стріча з циклю «Łemkowie – opowieść w skrawkach», посвяченого істориі, культурі і языкови Лемків. Подія є подiлена на пару блоків. Першый з них буде посвяченый Лемкам вчера і днеска, то єст буде о тым, кым сут Лемкы – в рiжных контекстах. Пак участникы будут мочы взяти участ в лекциі лемківского языка, підчас котрой познают м.ін. основны слова, звороты а так само азбуку. Стрічу закінчыт част о лемківскій музиці, співі і танци, яка даст участникам шансу не лем послухати, але тіж активні влучыти ся в познаваня традициі. Стрічу поведут Оксана Грабан-Ліхтаньска і Данько Горощак. На подію прошены сут тоты, котры уж знают лемкiвску культуру, а так само тоты, котры хотят ю познати. Вступ дармо.