Сумар дня на 31. серпня/авґуста 2026 р.

Приносиме вам сумар медияльной ґрупы ЛЕМ.фм+ на ден 31. серпня/авґуста 2026 р.

Святочне одкрытя Музею Модерной Штукы Енді Варголя в Меджелабірцях

Уж в найблизшу пятницю пройде торжественне одкрытя Музею Модерной Штукы Енді Варголя в Меджелабірцях. Припомнийме, што Музей Модерной Штукы Енді Варголя в Меджелабірцях, єден з двох музеів Варголя на світі і єдиный в Европі, є од марця 2023 р. запертый – переходил в тым часі велику реконструкцию. По перебудові в музею нашли ся новы експозицийно-едукацийны просторы, амфітеатр ци зелены елементы, такы як зелена стріха. Модернізуваны были так само технолоґіі, в тым систем безпекы. Подія одкрытя пройде в пятницю 4. вересня/септембра в год. од 9.00 до 16.00, при участи Дональда Варголы, сыновця Енді Варгола, якій є амбасадором святочного одкрытя. В рамках музичной части запрезентуют ся: Катаріна Кошчова, Домініка Новотна і AMC Trio та Комайота. Будут і додатковы атракциі, такы як варштаты сітодруку. В годинах тырваня подіі будут тіж індивідуальны прогулькы по музею. Веце о одкрытю музею прочытате в дописі на нашым портали. Цінник вступного найдете на фейсбуковым сайті Музею.

Торжества з нагоды дня памяти священномученика Максима Ґорлицкого

Православна парохія св. Тройці в Ґорлицях просит до участи в торжественных богослужынях з нагоды дня памяти священномученика Максима Ґорлицкого, што будут проходити в катедральній церкви в Ґорлицях в днях 5. і 6. вересня/септембра. Традицийні, уж 9. раз, в передден свята, тє. в суботу 5. вересня/септембра, одбуде ся піше поломництво зо Ждыні до Ґорлиц, на свято покровителя перемышльско-ґорлицкой єпархіі. Зачне ся оно рано о 5.00 год св. Літургійом в церкви Покровы Пресвятой Богородиці в Ждыни, де хрещеный был св. Максим. Пак поломникы підут через Ждыню, Ґладышів, Маластівску Маґуру, Рыхвалд, Сяры і Ґорлиці. Участ в поломництві мож зголосити до 2. вересня/септембра. В переден свята о 17.00 год. в ґорлицкій катедрі буде правлена всеночна. В ден свята – неділю 6. вересня/септембра, перша Літургія буде служена о 6.00 рано, пак о 8.30 чытаный буде акафист перед мощами св. Максима. О год. 9.45 привитаны будут прибывшы єрархы, а о 10.00 год. зачне ся головна св. Літургія.

Крижижівка і Розтока Велика зыскали канализацийну сіт

Завершыла ся будова канализациі в Крижівці і Розтоці Великій. Выконаня близко 10 км сіти было єдном з найважнійшых інвестиций в ґміні Лабова в послідніх роках. Як подала війт Марта Слабый, жытелі можут уж складати одповідні внескы, тыкаючы прилучынь. Мож іх зложыти особисто в уряді, почтом або в електронічній формі. Канализация в Крижівці і Розтоці Великій означат зліпшыня не лем условій жытя мешканців, але і якости охороны середовиска. Будова сіти тырвала рік, коштувала понад 2 млн 700 тис. злотых.

Історична спортова подія в Креници

В найблизшых днях в Креници пройде історична спортова подія. Од 2. до 5. вересня/септембра в Солотвинах Арені одбуде ся Погар Світа в слекляйн [slackline], значыт ходжыню по тасьмі, котра єст завішена над земльом. Найвекшом атракцийом змагань буде веце як пілторакілометрова тасьма розпята медже видоковом вежом Солотвины Арена а Креницком Яворином. В найвысшым пункті буде ся находила веце як 200 метрів над земльом. До Крениці приде коло 30 передовых спортовців з цілого світа, м.ін. зо ЗША, Японіі ци Кытаю. Орґанізаторы заповідают не лем ривализацию о пункты Погару Світа, але тіж пробу, жебы установити рекорд світа в переході на час і побитя рекорду Польщы в долгости тасьмы. В проґрамі нашли ся тіж видовисковы конкуренциі з ефектовныма скоками і акробациями. Подія має промувати Креницю як місце орґанізуваня спортовых змагань о світовій позициі.