Сумар дня на 1. вересня/септембра 2026 р.

Приносиме вам сумар медияльной ґрупы ЛЕМ.фм+ на ден 1. вересня/септембра 2026 р.

19. Інновиця уж в тот вiкенд

Од 3. до 5. вересня/септембра в Новици буде проходила 19. едиция Театральных Стріч Інновиця. Як каждого рока, проґрам подіі обнимат театральны спектаклі, музику, перформансы і артистичны діяня. Тогорічну едицию отворит 3. вересня/септембра спектакль «Stand-up сідячы. Зільник Анны Сенюк». В дальшых днях публика буде виділа м.ін. представлiня Театру Akt, Театру Mimo, Племя і Театру Chorea. В проґрамі нашли ся тіж концерты, выставы, стрічы та діяня звязаны з локальном спадковином. Важным пунктом суботнього проґраму буде спектакль «Три ябка» приготовленый Стоваришыньом «Руска Бурса» в Ґорлицях. Пєса, яку написал Станіслав Білый, порушат універсальны вопросы, вписуючы іх в лемківскы реалия. В проґрамі нашла ся тіж презентация образiв Анджея Жыґадла «Деревце» та стріча посвячена екосистемови Маґуры.

На выбраны спектаклі обовязуют безплатны бiлеты. Детальный проґрам 19. Театральных Стріч Інновиця доступный єст на сайті орґанізатора.

Тереновы дослiджыня в Явірках. Ци буде штоси о Русинах?

В днях 18.–20. серпня/авґуста в Явірках ведены были тереновы дослiджыня, реализуваны працівниками Одділіня Дослiджынь і Обробкы Збірок Малопольского Центра Культуры SOKÓŁ в Новым Санчы. Бадачы бесідували з жытелями села, реґіоналистами і особами заанґажуваныма в жытя місцевости. Цiлю дослiджынь было познати сучасны Явіркы, а особливо локальну памят, родинны істориi, достоменнiст мешканцiв та зміны, што проходят в місцевости. Бесіды тыкали тіж локальных звыкiв, традиций і памяти о давных жытелях. Явіркы мают свою русиньску минуліст. В тым контексті особливі цікавы сут бесіды на тему памяти о давных жытелях. Надієме ся, же зобраны при досліджынях оповіданя і материялы дозволят одкрыти тіж новы інформациі о давнiй і теперішнiй присутности Русинів в просторі села і памяти о них. Проєкт вела Монiка Кужея, кєрівничка Одділіня Дослiджынь і Обробкы Збірок, вєдно з ансамбльом працівників МЦК SOKÓŁ. Зобраны реляциі і материялы мают быти схоснувати до дальшой документациі соспільных і культуровых перемін реґіону.

«Туристичны Скарбы Малопольщы» – конкурс

Зачала ся осма едиция конкурсу «Туристичны Скарбы Малопольщы», котрого цільом єст выріжніти цікавы і вынятковы місця, подіі та туристичны атракциі в реґіоні. Орґанізаторы акциі заохочают жытелiв Малопольщы зголошувати своі пропозициi – а серед них певністю не бракне місц звязаных з Лемковином. Конкурс обнимат шіст катеґорий: Місце з климатом, Найцікавшый туристичный шляк, Діє ся – вынятковы туристичны подіі, Унікальна туристична атракция, Сельскы климаты – одпочынок близко природы та В гостині – кулінарна оферта. Зголосити мож не лем конкретну місцевіст ци атракцию, але тіж шлякы, подіі ци місце одпочынку. Вартат зато подумати, што на Лемковині заслугує на шырше вказаня. Конкурс має одкрытый характер, каждый може переслати свою пропозицию. Зголошыня приниманы сут до кiнця 9. вересня/септембра 2026 р. посередництвом електронічного формуляря.

Новый шкільный рік

Днес, 1. вересня/септембра, зачынат ся шкільный рік 2026/2027. По вакацийній перерві ученикы вертают до шкіл – зачынат ся наступный рік наукы, новых досвідчынь і стріч. Вшыткым ученикам желаме доброго початку рока, цікавости і успiхiв, а учытелям – терпеливости і мотивациі до працы.