«Голосы Русинів Підкарпатя» – середа, 18.10 год.

Вісемдесятьрічный Нестор Мальчицькый – імя поязане з гуслями, дітьсков музичнов школов, фолк-рокашом «Руснакы», та із самым містом Мукачовом. Заслуженый працовник културы Україны, понад 50 років свого жывота присятив навчаню дітей гры на гусльох.

Дякуючі Нестору Антоновічу родне му місто тямить про ансамбель «Латорчанка», котрый грав на танцьох і быв фест популарным в Мукачові. А іщі веце знають на Підкарпатю леґендарных «Руснаків» – фолккапелу, яка сокотить і популарізує русиньску народну співанку.

Правда, в репертоарі «Руснаків» суть і україньскы, словацькы і мадярьскы співанкы. Унікатным є факт, тот капела грає вже скоро 50 років і не розпадать ся. А Нестор Малчицькый не робить із себе гонорного як керовник «Руснаків», а тихо грає в капелі з другыма, як простый гудак, на свойих любимых гуслях.

Любов до гуслів стала змыслом цілого його жытя: уже понад 75 років він не пущать їх з рук, продовжуючі выступати на сцені і даровати свою гудьбу публіці.

Слухайте «Голосы Русинів Підкарпатя» в середу 2-го септембра 2026 р. о 18.10 год., або повторіня в четверь 3-го септембра о 4.30 год. і в суботу 5-го септембра о 11.00 год. за русиньскым часом.