Сумар дня на 2. вересня/септембра 2026 р.

Приносиме вам сумар медияльной ґрупы ЛЕМ.фм+ на ден 2. вересня/септембра 2026 р.

Гості з США познали русиньскы парохіі

Американьскій римокатолицкій єпископ Ларрі Джеймс Кулик разом з вірныма одвиділи русиньскы села Торискы і Нижні Репашы на Словациі. Візита мала духовый і культурный характер. Гості стрітили ся з місцевыма вірныма, познали історию парохій та богату русиньску традицию, котра і днес є жыва в тых селах. Підчас стріч бесідувано о важности захованя віры, языка і нацийональной ідентичности в русиньскых громадах. В проґрамі візиты были молитвы, стрічы з мешканцями та обзераня місцевых храмів і памяток. Адміністратор парохіі в Торисках оповіл о вызначных родаках, котры мали безпосереднє або посереднє влияня з жытьом Церкви в ЗША. Оповідал м.ін. о владыці Йоані Брадачу ци священнику Йосифі Ганули. Для мешканців місцевости Торискы і Нижні Репашы то была нагода запрезентувати громадянам ЗША, а потомкам Словаків, русиньску культуру і язык.

«Лемківскій Чытательскій Клюб» – перша така ініциятива для наймолодшых!

Во Вроцлаві одбуде ся стріча для наймолодшых – в неділю, 6. вересня/септембра о 15.00 год., в Брохівскым Центрі Локальной Активности пройде стріча для діти «Лемківскій Чытательскій Клюб». Орґанізаторы заплянували ріжны гры, забавы і музичны атракциі, завдякы котрым діти будут мочы познати лемківскы вершыкы, байкы, анімациі та співанкы. Подія має служыти не лем добрій забаві, але тіж інтеґрациі, має тіж помочы наймолодшому поколіню познати лемківскій язык. Кєд буде сприятлива погода, то стріча пройде в формі родинного пікніку. Орґанізаторы заохочают взяти зо собом деркы і перекускы. Кєд бы ляло – активности пройдут в будинку. Участ в подіі є дармова, але обовязуют скоршы записы через інтернетовый формуляр. Ініциятиву орґанізує ґрупа «Фай по свому», котра діє при Стоваришыню Лемко Тавер. Партнерами подіі сут Фундация «Made in Brochów» і Фундация «Стара Дорога». Проєкт фінансує Інститут Яызковой Ріжнорідности.

Хто поможе ратувати лемківскы нагробкы?

Каміняре вертают до Ґладышова. Потрібны сут волонтеры до ратуваня лемківскых нагробків. В днях од 17. до 19. вересня/септембра на цмонтери в Ґладышові буде проходил другій етап тогорічных ремонтово-порядковых робіт. Орґанізаторы, Каміняре Кычеры, што діют при стоваришыню Лемківскій Ансамбль Пісні і Танця «Кычера», просят вшыткых симпатиків і волонтерів до того, жебы влучыти ся в акцию ратуваня материяльных елементів лемківской спадковины. Роботы реализуваны сут під ведіньом Шымона Моджеєвского зо Стоваришыня Маґурич. Каміняре Кычеры сут активны од 2019 рока. Минулого рока зачали працувати при помниках в Ґладышові. В липци/юлию того рока прошол черговый етап робіт. Окрем консерваторскых робіт, участникы могли познати таємниці каміняркы, навчыти ся одчытувати і одтваряти стары інскрипциі, а тіж понзати вынятковый архів, котрый згромадил Шымон Моджеєвскій через парудесят років діяльности Стоваришыня Маґурич. Архівальны фотоґрафіі нагробных інскрипций мож схоснувати тепер, при ведіню реновациі знищеных, тяжкых уж до одчытаня написів. Тото, кілько поведе ся зробити в вересни/септембрі, залежыт од чысла волонтерів, зато заохачаме прилучыти ся до робіт. Контакт до орґанізаторів: remontlabowa@gmail.com.

Анімация «Еха» на дальшых фестівалях!

Анімация «Еха» о втраті і памяти, інспірувана насильным выселіньом Лемків з 1947 рока, буде презентувана на наступных фестівалях. Кінцьом того місяця «Еха» будут вказаны в рамках Медженародного Фестівалю Анімациі ЕТЕР в Лодзи, а місяц пізнійше – підчас Фестівалю Камера Акция в рамках Медженародного Конкурсу AUTHORS SPOTLIGHT в катеґориі Найліпша Анімация. Авторком анімациі єст Йоанна Фучко – лемківска інтердисциплінарна артистка з Зеленой Горы. Фільм «Еха» презентуваный был уж підчас Медженародного Фестівалю Анімуваных Фільмів АНІМАТОР в Познані, дале – підчас загальнопольского фестівалю незалежных фільмів Solanin Film Festiwal в Новій Соли, а тіж на фестівали незалежной анімациі і штукы медий Linoleum Contemporary Animation and Media Art Festival в Кыйові – найвекшым такым фестівали на Украіні.