ЛЕМ.фм з концесийом на дальшых 10 років!

Явило ся рішыня Державной Рады Радийофоніі і Телевізиі, котре має особливе значыня для лемківской спільноты в Польщы. ДРРіТ продолжыла на черговых десят років концесию для радийового проґраму – ЛЕМ.фм, котрого выдавцьом єст Стоваришыня «Руска Бурса» в Ґорлицях.

То важна інформация для вшыткых слухачів, якы наштоден наслухуют наш проґрам, в котрым по нашому бесідуєме о розмаітых річах.

Рішыня ДРРіТ означат, же ЛЕМ.фм буде молго формальні продолжати свою діяльніст наступных десят років. Продолжыня концесиі єст потверджыньом стабільной позициі радия на медияльным рынку і узнаньом для його дотеперішньой діяльности.

Для вельох нашых слухачів радийо стало ся чысми веце як лем джерелом інформаиций і музикы. То простір, в котрым мож почути рідный язык, познати актуальности, котры тыкают спільноты розсіяной по цілій Польщы, а тіж утримувати особливу реляцию зо свойом спадковином. В часах, коли медиі нацийональных і етнічных меншын мусят бороти ся о тото, жебы быти видимы, кажда ґаранция дальшого фунґуваня має великє значыня.

ЛЕМ.фм од років промує лемківску культуру, презентує творчіст артистів звязаных з реґіоном, передає реляциі з подій орґанізуваных в середовиску. Завдякы діяльности радия голос нашой спільноты доходит не лем до мешканців Лемковины ци Нижнього Шлеска, де находят ся высылачы, але тіж до Лемків по цілій Польщы і по світі – інтернетовым сиґналом.

Інформацию о продолжыню концесиі Державна Рада Радийофоніі і Телевізиі подла по своім засіданю 2. вересня/септембра 2026 рока. Серед ріжных рішынь Рады нашла ся як раз згода для радийового проґраму ЛЕМ.фм веденого Руском Бурсом.

Факт тот є хосеннный для цілой русиньской спільноты. Тіж зато, што ЛЕМ.фм має трансграничный характер. Означат бо, же дале будеме мати своє медиюм, котре дбат о язык, традициі і достоменніст вшыткых Русинів. Своє місце в рамівці мают не лем Лемкы з Польщы, але Русины зо Словациі ци русиньскы активісты і творці з Украіны. Тота послідня присутніст єст особливо важна в контексті того, же Русины з Підкарпатя не дочекали ся узнаня в своій державі. Завдякы ЛЕМ.фм можут оповідати о своій істориі, культурі, языку, сучасній достоменности і актуальных справах, дотераючы до шырокой ґрупы слухачів.

В тот спосіб радийо полнит выняткову ролю не лем інформацийного медиюм, але тіж сучасной плятформы дла цілого русиньского середовиска розділеного границями держав. Помагат утримувати взаімны реляциі і остає тім місцьом, котре в практиці будує понаддержавну спільноту Русинів і дає єй свій, незалежный голос.

Кєд серед Вас – слухачів і чытачів ЛЕМ.фм – находят ся особы, котры хтіли бы зачати діяти в журналистичній роботі, то сердечні запрашаме! Можна вести музичный проґрам, робити авторску тематичну передачу ци бесідувати з людми. Або іщы дашто інче – ждеме на Вас!

Охочых просиме о контакт: radio@lem.fm.