Сумар дня на 2. жолтня/октобра 2026 р.

Приносиме вам сумар медияльной ґрупы ЛЕМ.фм+ на ден 2. жолтня/октобра 2026 р.

Rапорт з досліджыня жытелів ґорлицкого повіту на тему краєвиду Низкого Бескіду

Стоваришыня «Руска Бурса» в Ґорлицях опубликувало рапорт з досліджыня жытелів ґорлицкого повіту на тему краєвиду Низкого Бескіду. Документ был запрезентуваный 24. вересня/септембра тр. в Ґорлицях підчас конференциі «Низкій Бескід: спільный краєвид. Даны, діалоґ, рішыня». Авторами рапорту сут Юстина Новак, Северин Ґродный, Домініка Федериґа і Каміль Федериґа. Основом опрацуваня єст досліджыня понад 800 жытелів ґорлицкого повіту. Рапорт дополнюют м.ін. публичны діалоґы і інтернетове баданя осіб одвиджаючых Низкій Бескід. З рапорту выникат, окрем інчого, што краєвид Низкого Бескіду любит ся 98% баданых жытелів. Вказувано м.ін. на горы, лісы і зелін, але і тишу, спокій і спосіб досвідчаня місця. Респонденты шыроко підпорюют охорону краєвиду і ограничыня місц, в котрых мож будувати, єдночасно вельо з них высоко цінит свободу властителя ділянкы. Сильна єст тіж підпора для охороны природы в розвитку туристикы. Досліджыня обнимат тіж вельокультуровіст і лемківскій язык: його присутніст в штоденній бесіді, на подіях, в медиях і на таблицях з назвами місцевости. Окремый розділ посвячено долинам давных сел: Чорного, Радоцины, Долгого, Незнайовой і Липной. Подля баданя туристів до Низкого Бескіду притігат головно спокій, брак масовой туристикы, природа та істория і культура. Як проблемы вказали доізд і комунікацию. Полный рапорт, як і запис конференциі можете обзерати на інтернетовым сайті Стоваришыня: ruskabursa.org.

Награня православной Літургіі з Тылявы в TVP Культура

В найблизшу неділю 4. жолтня/октобра в польскій державній телевізиі мож буде обзерати награня православной Літургіі з Тылявы з 19. вересня/септембра тр. В Тыляві проходили товды торжества для упамятніня 100. річниці вертаня Лемків до православя. Богослужыня навязувало до історичных дій з 1926 р., коли тылявска парохія, як перша, праві в цілости выступила з Грекокатолицкой Церкви, а жытелі звернули ся до варшавского митрополиты Діонісия о долучыня іх до Православной Церкви. В черговых роках явиско обняло десяткы лемківскых сел і довело до громадных тзв. повоторів до віры вітців. Тылява стала символом початку процесу конверсий на Лемковині. Святочну Літургію в Тыляві очелил архієпископ ґорлицкій і перемышльскій Паісий, в асисті чысленного духовенства. Співал хор Ірмос під ведіньом імости Мариянны Ярой. Награня св. Літургіі з Тылявы мож обзерати в найблизшу неділю о 8.00 год. в TVP Культура.

15-літя русиньской ініциятивы в Чешскій Республиці – Rusini.cz

Заран в Домі Нацийональных Меншын в чешскій Празі святкувала своє 15-літя буде русиньска ініциятива в Чешскій Республиці – Rusini.cz. При тій нагоді 10. річницю основаня святкувала буде співоча ґрупа Кантар. На подіі запрезентуют ся і гості зо Словациі. Окрем того Русины в Празі інформуют, што уж днес в рамках найвекшой словацкой імпрезы в Празі першыраз одбуде ся русиньскій вечер.

Порядковы варшытаты на радоциньскым цмонтери

Стоваришыня Долины в найблизшый вікенд просит до участи в порядковых варшытатах на радоциньскым цмонтери. В рамках того будут ропуваны жырди – свіжо поставленого огороджыня. Стоваришыня даст материялы і почастунок. Варштаты будут проходити в суботу і неділю медже 10.00 а 15.00 год. Радоцина то днес неістнуюче лемківскє село, якє было остаточно выселене в 1947 р. в рамках акциі «Вісла».