В Ужгороді припомянули собі річніцю народжіня Йосифа Бокшая

2-го октобра 2026-го року минуло точно 135 років од народжіня Йосифа Бокшая, маляря, педаґоґа, єдного із основателів русиньской Підкарпатьской малярьской школы.

Як інформовав Закарпатьскый областный художный музей імени Йосифа Бокшая в Ужгороді, із той нагоды в тот день приопомянули собі того коріфея підкарпатьского уменя, і одкрыли выставу його творів.

Наперед одбыло ся положіня квіток на гробі художника, пак была в просторах музея одкрыта выстава, котра оповідать о основных етапах творчости Йосифа Бокшая. Велика часть творів, котры суть выставлены, є на сакралну тему.

В рамках святковань річніці народжіня Преосвяченый владыка Теодор Мацапула, правлячій єпіскоп Мукачовской ґрекокатолицькой єпархії, одслужыв архієрейску службу. На ній брав участь і Преосвященый владыка Авел Сочка – ніредьгазьскый єпарха, і його секретарь отець Тібор Сікора, далше предстоятель Ґрекокатолицького ліцею в Берегові отець Іштван Мароші, як і ґенералный конзул Словацькой републікы в Ужгороді Генріх Сасай.

Як інформовав музей, із матеріалами експозіції і етапами творчой пути Йосифа Бокшая присутных познакомила заступниця директора із науковой роботы Людмила Біксей. На святочнім одкрытю выставы выступали і далшы цінны гості, наприклад першый заступник головы Закарпатьской областной рады Андрій Шекета ці ректор Закарпатьской академії умень Михайло Приймич.

Выставу присвячену річніці народжіня Йосифа Бокшая буде мож в просторах музея видіти до кінця октобра.

Йосиф Бокшай (рр. 1891 – 1975) быв родаком із Кобылецькой Поляны. Быв абсолвентом ґімназії в Мукачові і Будапештьской академії умень. Од 1919-го року актівно залучів ся до културного діяня на Підкарпатю. В 1927-ім році основав із Адалбертом Ерделійом Публічну школу мальованя, котра выховала множество умелців Підкарпатьской малярьской школы.

По 1945-ім році, коли Підкарпатя анектовала Москва, доказав собі зохабити свою автономію художника. Став і членом-корешпондентом Академії умень СССР. Вмер в Ужгороді, де днесь існує музей, котрый несе його імя.

Фото: FB/ Закарпатський обласний художній музей ім.Й.Бокшая.