В Габурі мають нову стежку названу Край Русинів і Енді Варгола

Крайска орґанізація турістічного руху (КОТР) Prešov Region розшырила турістічны атракції Пряшівского краю о нову забавно-научну стежку під назвов Край Русинів і Енді Варгола, котра прибыла в селі Габура, Меджілабірьского окресу.

Як аґентуру TASR інформовала Барбора Чехова із КОТР Prešov Region, приблизно двокілометрова легша траса капчать русиньску културу, історію, природу Низкых Бескідів, і заповідь світового умелця Енді Варгола.

Стежка є конціпована про родины із дітми, але і далшых навщівників реґіону. Траса веде од деревяного храму в Габурі, котрый є точнов репліков храму, котрый там колись стояв, і прямує на верьх Климів, котрый є на граніці Габуры і Миковой, де народили ся родічі Енді Варгола. Стежка інтерактівнов формов приближує історію Русинів, міґрацію Вархоловых до Америкы, ці історію здобываня ропы в реґіоні.

Турісты мають ку діспозіції едукатівны елементы, можуть спробовати дотыковы рельєфы, таблу із блудиском, котра імітує путь до Америкы, ці механізмы, якы приближують природны процесы і здобываня ропы в минулости.

Інтересностьов є і едукатівне пексесо, котре капчать мотівы поп-арту із сімболами русиньского реґіону.

„Зноваодкрытый Музей модерного уменя Енді Варгола в Меджілабірцях є вызначным імпулзом про турістічный рух в тій части краю. Стежка в Габурі на його понуку природно надвязує, і дає навщівникам далшу причіну іти із Меджілаборець і до околіці. Нашым цільом є, жебы навщіва музея не была єдинов штаційов, але мотівовала людей спознати і далшы місця, і перебыти в реґіоні веце часу,“ повів Мартін Яношко, директор КОТР Prešov Region.

В Габурі, як уж было спомянуто, є і точна репліка деревяного Храму святого Николая Чудотворця ці веце як пятьметровый памятник князя Лабірця. Но реґіон того має веце, што можуть турісты посмотрити. Інтересным є і стародавный Монастырь Сошествія Святого Духа в Краснім Броді ці Цінтерь русиньскых особностей в Чертіжнім.

Заставити ся мож і в селі Гавай, де КОТР Region Prešov вытворила пункт фотоґрафованя, в рамках котрого є наіншталована репліка твору Варгола під назвов Baked Hawaii. „Цільом КОТР Prešov Region є посередництвом подобных проєктів капчати окремы турістічны локаліты і мотівовати турістів, жебы в реґіону перебыли веце часу,“ повіла Барбора Чехова.

Фото: FB/Horný Zemplín.