Сумар дня на 14. жолтня/октобра 2026 р.

Приносиме вам сумар медияльной ґрупы ЛЕМ.фм+ на ден 14. жолтня/октобра 2026 р.

Стоваришыня Лемків просит на дві дальшы осінні подіі

Стоваришыня Лемків просит на дві дальшы осінні подіі. Уж 25. жолтня/октобра одбудут ся ХХХІІ Стрічы з Лемківском Культуром в Ґожові Великопольскым. Зачнут ся о 16.00 год. в Театрі ім. Юлиюша Остервы, до котрого подія вертат по парурічній переві, колиси одбывала ся літньом пором в центрі міста. В рамках подіі выступлят Лемко Тавер Юньор, Карпатія, Дамир та Ансамбль Народного Танця «Малы Ґожовякы». Вступне на подію то 40 зл (мож придбати в касі театру). Кус пізнійше, в днях 7.-8. листопада/новембра одбудут ся ХІХ Стрічы Трьох Поколінь з Лемківском Культуром, якы орґанізує пшемківскій Кружок СЛ. Того рока подія одбуде ся в першый ден в Пшемкові (початок о 16.00 год.), а другого дня в Любіні – в Центрі Культуры Муза – початок так само о 16.00 год.

Похорон бл. п. Адама Барны

Днес в ліґницкій православній церкви зачынают ся похоронны богослужыня за бл. п. Адамом Барном (Парастас є служеный о 18.00 год.). Заупокійна Літургія буде одслужена заран о год. 9.30 в церкви в Ліґници, а пак похорон в Рудній. Адам Барна одышол 12. жолтня/октобра, лишаючы по собі богатый доробок, котрый для многых є безцінным джерелом знаня о істориі і культурі Лемків. Вродил ся Адам Барна в 1926 році в селі Чорне. Як молодый чловек досвідчыл драматів ІІ світовой войны, а потім выселінь. По выгнаню на західні землі оселил ся в Ліґници, де через десяткы років діял в реліґійным жытю лемківской спільноты. Был єдным з найстаршых жыючых православных дяків в вроцлавско-щеціньскій єпархіі. Особливе місце в його жытю занимала писательска діяльніст. Опубликувал парунадцет книжок, споминів і опрацувань посвяченых істориі Лемковины, долі выселенців і діям поєдных місцевости реґіону. Был автором або спілавтором моноґрафій такых місцевости як Чорне, Ізбы, Білична, Боґуша ци Перунка. Документувал тіж реліґійне жытя Лемків по выселінях. Дякуючы його працы удало ся охоронити од забытя вельо реляций свідків істориі, локальных традиций і фактів, што тыкают істориі і культуры Лемків. Для наступных поколінь лишыл выняткове свідоцтво світа, котрый перестал уж істнувати. Вічна Йому Памят.

Школа в Білянці по ремонті

Давна лемківска школа в Білянці зас набрала блеску. По завершыню реновацийных робіт явила ся нова думка на выкорыстаня будинку. Ремонт, якій такой тепер ся закінчыл, обнимал м.ін. стрічу, выміну выглядів і двери ци ремонт середины. Вартіст будовляных робіт вынесла понад 259 тис. зл, з чого значна част коштів походила з державного дофінансуваня. Одновленый історичный будинок може зас служыти місцевій громаді, а нова думка на його выкорыстаня дає надію, што школа не буде лем памятком минулого, але тіж місцьом активности і стріч для жытелів Білянкы.

Беляньскій Експрес з новыма получынями

Мушына може в недалекій будучности мати ліпше желізничне получыня зо Словацийом і інчыма европейскыма містами. В плянах є розвиток Бeляньского Експресу, котрый получыт польску Мушыну зо словацкым Попрадом. Поізды мали бы курсувати што дві годины. Получыня має вести через Стару Любовню, Подолинец і Кежмарок, даючы туристам і жытелям погранича можніст выгідной подорожы медже Польщом і Словацийом. Частійшы курсы могли бы піднести туристичну атракцийніст реґіону і заохотити більше осіб до подорожуваня поіздом. В перспективі самоурядовці розважают тіж можливіст получынь з Відньом і Будапештом. Реализация такых плянів могла бы значно поліпшыти доступ до середньоевропейскых метрополий. На тот момемнт ключовом справом є збільшыня частоты курсуваня Беляньского Експресу. Дальшы рішыня будут залежати од догварінь орґанізаторів транспорту.