Презідент выменовав Анну Плішкову за професорку

Презідент Словацькой републікы Петер Пеллеґріні в середу 14-го октобра 2026-го року выменовав 30 новых професорів і професорок універзіт і высокых школ. Меджі выменованыма є і Анна Плішкова, директорка Інштітуту русиньского языка і културы Пряшівской універзіты в Пряшові.

Русиньска лінґвістка была выменована за професорку в научній области філолоґія – славяньскы языкы і літературы.

Нововыменована проф. ПгДр. Анна Плішкова, ПгД. (р. 1964) є абсолвентков  Філозофічной факулты Універзіты Павла Йозефа Шафарика в Пряшові, де штудовала шпеціалізацію словацькый і україньскый язык і література.

Їй першов роботов по скончіню высокой школы стала редакторьска робота в україньскій редакції тыжденника Нове життя, котрый выдавав Культурний союз українських трудящих. Початком 1990-го року Анна Плішкова стала редакторков одповіднов за двосторінку ґазеты Нове життя, котра мала назву Голос Русинів, і выходила по русиньскы.

Пак стала членков колектіву новой редакції, яка зачала выдавати русиньску ґазету Народны новинкы і двомісячный журнал Русин. Редакція належала під Русиньску оброду. Была заступничков шефредактора Александра Зозуляка, і редакторков Народных новинок і часопису Русин од їх зроду в році 1991, і робила про пресу до року 1998.

Як языкова редакторка редіґовала публікації выдаваны Русиньсков обродов. Робила і над орфоґрафічным словником, котрый быв потребный ку кодіфікації, як одповідна редакторка.

У 1998-ім році почала нову професіонална путь. Почала учіти на нововыникнутім Одділіню русиньского языка і културы Інштітуту народностных штудій і чуджіх языків Пряшівской універзіты в Пряшові. Од того Анна Плішкова діє в рамках академічной сферы.

Є авторков научных моноґрафій, авторков і співавторков высокошкольскых і середньошкольскых учебників, множества научных і фаховых, домашніх і загранічных публікацій.

В році 2010 ся габілітовала на доцентку русиньского языка, од 2023-го року была у функції універзітного професора на Пряшівскій універзіті. В році 2008 стала директорков Інштітуту русиньского языка і културы Пряшівской універзіты. В роках 2018 аж 2023 была і директорков Центра языків і култур народностных меншын, під котрый інштітут належыть.

За свою роботу у сфері русиністікы была нагороджена Анна Плішкова Премійов святых Кіріла і Мефтодія, Премійов імени академіка Антонія Годинкы, Цінов ректора Пряшівской універзіты і Бронзовов медайлов Пряшівской універзіты.

В роках 2019 аж 2024 была членков порадного орґану презіденткы Словацькой републікы Зузаны Чапутовой про народностны меншыны за Русинів.

Фото: FB/Peter Pellegrini.