Давна школа в Білянці то важне місце в нашій істориі. Як раз завершыла ся єй модернізация

Давна лемківска школа в Білянці, котра є важным місцьом в істориі місцевой громады і лемківского культурового жытя, перешла реновацию. По парох роках, коли будинок не был выкорыстуваный, є шанса, што зас стане простором, в котрым будут стрічати ся люде, а лемківска спадковина буде мати гын своє місце.

Ремонт історичной будівлі был важным кроком в ратуваню памяти о місци, котре через десятлітя было звязане з лемківскым шкільництвом, культуром і діяльністю люди, якы по выгнаню і поворотах будували наново лемківскє соспільне жытя.

Реновация завершена. Што дальше?

Ремонт был потрібный, жебы сохранити деревяну будівлю перед дальшым нищыньом і вернути єй належный выгляд. В рамках робіт переведено м.ін. ремонт даху і пошкодженых елементів конструкциі, реконструкцию части фасады, як тіж реновацию выглядів і двері.

Важным было захованя історичного характеру обєкту – якій є приміром традицийного лемківского будівництва.

За модернізацию будинку ґміна Ґорлиці старала ся при фінансовій підпорі з Урядового Проґраму Одбудовы Забытків. Осіню 2023 р., коли інформували сме о плянах ремонту, передвиджено дві траншы дофінансуваня – 100 тис. зл і 150 тис. зл. Товды головным вызваньом было не лем приготовліня документациі і проведіня робіт, але тіж найти для школы такє презначыня, жебы могла служыти дальшым поколіням.

Днес, коли реновация уж закіныла, найважнійшым стає рішыня, якым цілям будинок давной школы повинен днес служыти.

Нова думка на выкорыстаня школы може стати нагодом, жебы зас звернути увагу на єй значыня для Білянкы і цілой Лемковины. Як підчеркнул війт ґміны Ґорлиці Ян Пшыбыльскій, до школы буде перенесена Ґалерия Білянка, будуча Осередком Культуры Ґміны Ґорлиці. Значыт тото, што середина школы уж неодолга може помістити неєдну выставу.

Понад сто років істориі

Давна школа в Білянці рахує штонайменьше сто років, а деякы джерела подают, же могла быти збудувана іщы в ХІХ ст. До 1947 р. вчыли ся в ней лемківскы діти. По выганю школа стратила свою первістну функцию, але по даякым часі зас зачала служыти місцевій громаді. До початку 60. років ХХ ст. в будівлі зас проходило навчаня школярів, часто діти тых, што повело ся ім вернути з західніх земель.