ОСРС є проти будованя водного резервоару Тихый Потік і звертать увагу на різіка школьского закона

В Пряшові в пятніцю 16-го октобра 2026-го року одбыло ся 41-ше пленарне засіданя Округлого стола Русинів Словакії (ОСРС). Меджі темами, о котрых членове русиньской платформы діскутовали, быв і план будованя водного резервоару Тихый Потік ці новелізація школьского закона.

На засіданю брав участь і Ян Коцак – русиньскый амбасадор при Пряшівскім самосправнім краю (ПСК). За край одпрезентовав актівности, котры были реалізованы на основі меріторічной комунікації і співпраці меджі ОСРС і ПСК, але і властны ініціатівы, котры суть повязаны із русиньсков меншынов і їй реґіоном.

ОСРС оцінює кампань, котру при  нагоді зновуодкрытя Музея модерного уменя Енді Варгола в Меджілабірцях реалізує Крайска орґанізація турістічного руху – Prešov Region під назвов Край Русинів і Енді Варгола. Платформа конштатує, же ПСК став добрым партнером про русиньскы орґанізації.

ОСРС діскутовав і о плані будованя водного резервоару Тихый Потік. Із причіны той темы была на засіданя запрошена старостка села Штельбах (по словацькы Tichý Potok) Любіца Здравецька, а так само гідролоґ і енвіроменталіста Михал Кравчік.

По выслуханю вшыткых арґументів, з оглядом на то, же навеце знова іде о русиньске село, котре бы было будованьом резервоару постижене, ОСРС прияв узнесіня, в котрім одмітать будованя водного резервоару Тихый Потік і підтримує алтернатівны крокы на затримованя воды, котры суть енвіроментално менше шкодливы, і котры поможуть рішыти проблемы в цілім краю, включно Проґраму обновы водных жрідел, котрый быв схваленый Заступительством Пряшівского самосправного краю.

Темов засіданя было і школство, кедьже тото є про русиньску народностну меншыну довгодобо єднов із пріорітных областей, котра, нажаль, не є в успокоївім стані.

ОСРС діскутовав о рихтованій новелізації школьского закона, котра окрем іншого піднимать найнизше середнє чісло школярів в класах першого ступня із 13 на 15 і другого ступня із 15 на 18, запроваджать найнизше цілкове чісло 150 школярів повноорґанізованой основной школы, і выхаблять дотеперішній выняток, подля котрого мінімалны чісла не односили ся на класы основных школ із навчалным языком народностной меншыны.

Ку тій проблематіці так само было прияте узнесіня, в котрім ОСРС одмітать реформу школьства, яка запроваджать мінімалны чісла школярів без окремого вынятку про народностны школы і конштатує, же таке наставліня огрожує нелем русиньске народностне школство, але і існованя словацькых школ в малых селах із русиньскым населіньом, де то може вести до заникнутя школы обще. Зато жадать при новелізації закона окремый режім про народностны і малы сельскы школы.

ОСРС собі на своїм засіданю выбрав і двох новых членів презідії, кедьже по році кінчів мандат представительови за індівідуалных членів, і представительови за колектівных членів. До презідії по роках вертать за індівідуалных членів Александер Дулеба, котрый быв прешым председом ОСРС. За колектівных членів быв до презідії выбратый ґрекокатолицькый священик Іґор Панчак, якый представлять Общество святого Йоана Крестителя.