«Лемкы в Центрі» – того тыжня выстартувал цикль подій

Початком тыжня зачал ся цикль подій в рамках шыршого проєкту пн. «Лемкы в Центрі». Найблизшы акциі одбудут ся в днях 23. і 24. жолтня/октобра та 4. і 6. листопада/новембра в Центрі Творчых Діянь в Любіні.

«Перед нами місяц, в котрым традиция стрічат ся з сучасністю, музика оповідат істориі, а штука помагат одкрывати своі корені. Язык, котрый несе памят. Істориі, котры остают з нами на долго. Культура, котра фурт жыє і інспірує» – заохочат до участи в фестівали орґанізатор – Центер Творчых Діянь в Любіні.

Перша част фестівалю помалы уж ся кінчыт – то варштаты традицийного писаня ікон. Участникы од 19. жолтня/октобра познают під оком о. Павла Заброцкого технікы писаня ікон і церковных традиций.

Днес вечером одбуде ся вернісаж выставы Йоанны Фучко пн. «eLEMentarz». «На выставі презентую цикль робіт, котры навязуют до лемківского языка і до мойой особистой реляциі з тым языком» – оповідат артистка. Вернісаж одбуде ся о 18.00 год., а товаришыти му буде кураторскє опроваджаня і стріча з артистком. Вернісажови товаришыл буде выступ Дариі Кузяк на гушлях. «Єй присутніст то черговый голос в істориі о лемківскій культурі, корінях і сучасным жытю» – подає орґанізатор.

О ден, в суботу, в любіньскій православній церкви вызвучыт церковна музика. Мужскій Ансамбль Церковной Музикы «Катапетасма» запрезентує вельоголосовый спів і музику, што закорінена в вельовіковій традициі – візантийскій, статорускій і ґрузиньскій. «В простори церкви, котрой акустика становит натуральне дополніня співу, буде мож досвідчыти єй вынятковый характер» – заохочат орґанізатор. «Катапетасма» концертувала в Польщы і поза єй границями, а в своім доробку має м.ін. альбомы «Яблочыньскій Тритих» ци «Супрашльскій Рукопис». Хор веде др Лукаш Гайдученя – бадач церковной музикы і оперовый солиста.

Початком листопада/новембра в рамках дальшых подій фестівалю пройде стріча з Мєчыславом Бочнєвичом. Пан Бочнєвич поділит ся пережытями, што звязаны з выганяньом, а тіж родинныма фотоґрафіями. Бесіду модерувал буде Данько Горощак.

Завершыньом фестівалю буде концерт тріо S.H.A. (Сусанна Яра, Ганка Вуйцяк та Аґата Сємашко), якє м.ін. выконує творы Петра Мурянкы, котры спопуляризувала Сусанна Яра. Всітри артисткы то великы індивідуальности, котры знаме з вельох інчых музичных проєктів. Дякы каждой з солисток, в своім репертуарі S.H.A. мат польскы, словацкы, ромскы, украіньскы та лемківскы співанкы.

Орґанізатором фестівалю єст Центр Творчых Діянь в Любіні, партнерами Любіньскій Повірт, Православна Парохія Святой Тройці в Любіні та Фундация Kulturolubni. Подію зреализувано зо середків Музею Істориі Польщы в Варшаві в рамках проґраму Патріотизм Зарани.