Сумар дня на 23. жолтня/октобра 2026 р.

Приносиме вам сумар медияльной ґрупы ЛЕМ.фм+ на ден 23. жолтня/октобра 2026 р.

Нова ґондоля получыт центр і нижню Креницю

Нова ґондольова желізниця з центра Крениці до долины Чорного Потоку переходит до реализациі. Вчера одбыла ся офіцияльна презентация, вчас котрой вказана была візуализация новой ґондольовой желізниці і поданый гармоноґрам будовы. В минулым тыжни Ґондольова Желізниця Креницка Яворина С.А. і Ґміна Крениця підписали нотарияльны акт встановляючый служебніст переізду желізниці над теренами, што приналежат до міста. Місто выбрало тіж выконавцю проєкту. Інформувал о тым бургомайстер Крениці Пьотр Рыба. За бургомайстром, то великій крок в сторону реализациі єдной з найбарже стратеґічных туристичных інвестиций в істориі сучасной Крениці.

В осередках PKL зачынают технічный перегляд

То уж остатній момент, жебы выіхати ґондольом на Креницку Яворину осінньом пором. Од найблизшого понеділька зачынат ся технічный перегляд обєктів перед зимовым сезоном, котрый потырват аж до 27. листопада/новембра. Польскы Кабельны Желізниці (PKL) зачали тіж осінні передляды в другых осередках – до зимы не скорыстаме уж з келейкы на креницку Паркову Гору, на Каспровый Верх в Татрах, ци з креселок в Щавници. Осередкы PKL припоминают, што мимо переглядів дальше мож ся буде достати на поєдны верхы піше або біциґльом. Фурт діют там тіж дакотры атракциі. Дрібниці находят ся на інтернетовым сайті Польскых Кабельных Желізниц.

МВСіА глядат зовнішніх експертів, котры оцінят оферты на реализацию меншыновых задач

Міністер Внутрішніх Справ і Адміністрациі оголосил набір кандидаток і кандидатів на зовнішніх експертів оціняючых оферты складаны в рамках наборів оферт на реализацию в 2027 р. задач маючых на ціли охорону, захованя і розвиток культуровой достоменности нацийональных і етнічных меншын або захованя і розвиток реґіонального языка. Шансу в наборі мают м.ін. абсольвены социйолоґіі, етнолоґіі і культуровой антрополоґіі, культурознавства, кашебской етнофілолоґіі або ромолоґіі, як тіж особы, котры потвердят знаня з обшыри мешныновых справ в інчый спосіб окрисленый в оферті. Вымаганя мож чытати в оферті опубликуваній в сервісі Польской Республикы, в закладці Нацийональны і Етнічны Меншыны. Зголошыня мож выслати до 26. жолтня/октобра тр.

ХХХІІ Стрічы з Лемківском Культуром в Ґожові Великопольскым

Уж в найблизшу неділю 25. жолтня/октобра одбудут ся ХХХІІ Стрічы з Лемківском Культуром в Ґожові Великопольскым, на якы просит Стоваришыня Лемків. Подія зачне ся о 16.00 год. в Театрі ім. Юлиюша Остервы. Выступлят Лемко Тавер Юньор, Карпатія, Дамир та Ансамбль Народного Танця «Малы Ґожовякы». Вступне мож придбати в касі театру.

Варштаты лінорыту в Рускій Бурсі в Ґорлицях

Припоминаме і о варштатах лінорыту, котры одбудут ся уж заран в просторах Руской Бурсы в Ґорлицях. Занятя зачнут ся о 12.00 год і проведе іх русиньска ґрафічка Мартіна Сівчова. Лінорыт то ґрафічна техніка, в котрій рисунок вырізує ся в лінолеум, а пак переносит на папір при помочы фарбы. Участникы подіі будут мати нагоду познати основы той технікы і самы попрібувати своіх сил в ґрафічній творчости. Участ є безплатна, краснi просиме вшыткых заiнтересуваных.